વલસાડમાં મોડીફાઇડ સાયલન્સરવાળા બુલેટ ચાલકો સામે કાર્યવાહી:10 ચાલકો ઝડપાયા, સાયલન્સર કાઢી કાયદેસર પગલાં લેવાયાં

વલસાડ શહેરમાં ધ્વનિ પ્રદૂષણ ફેલાવતા મોડીફાઇડ સાયલન્સરવાળા બુલેટ ચાલકો સામે પોલીસે કડક કાર્યવાહી શરૂ કરી છે. તાજેતરમાં હાથ ધરાયેલા ચેકિંગ દરમિયાન આવા 10 જેટલા બુલેટ ચાલકો ઝડપાયા હતા. વલસાડ જિલ્લા પોલીસ વડા યુવરાજસિંહ જાડેજાની સૂચનાથી ટ્રાફિક પોલીસને શહેરમાં ધ્વનિ પ્રદૂષણ ફેલાવતા વાહનો સામે કડક પગલાં લેવા આદેશ અપાયો હતો. આ આદેશના પગલે, વલસાડ સિટી પોલીસની ટ્રાફિક ટીમે શહેરના વિવિધ મુખ્ય માર્ગો પર અચાનક વાહન ચેકિંગ હાથ ધર્યું હતું. આ ચેકિંગ દરમિયાન, મોડીફાઇડ સાયલન્સર લગાવીને બુલેટ ચલાવતા આશરે 10 ચાલકો પોલીસના હાથે ઝડપાઈ ગયા હતા. તપાસમાં સામે આવ્યું કે આ બુલેટમાં કંપની દ્વારા આપવામાં આવેલા મૂળ સાયલન્સરમાં ફેરફાર કરીને વધુ અવાજ કરનારા મોડીફાઇડ સાયલન્સર લગાવવામાં આવ્યા હતા. આવા સાયલન્સરને કારણે બુલેટ પસાર થાય ત્યારે ભારે અવાજ થતો હોવાથી આસપાસના વાહનચાલકો તેમજ સ્થાનિક લોકોને પરેશાનીનો સામનો કરવો પડતો હતો. ખાસ કરીને શહેરના મુખ્ય માર્ગો પર બુલેટના મોટા અવાજને કારણે ધ્વનિ પ્રદૂષણની સમસ્યા ઊભી થતી હોવાની ફરિયાદો વ્યાપક બની હતી, જેના પગલે પોલીસે આ કાર્યવાહી હાથ ધરી છે. ટ્રાફિક પોલીસે ઝડપાયેલા બુલેટ ચાલકો સામે નિયમ મુજબ કાયદેસરની કાર્યવાહી કરી હતી. આ ઉપરાંત, તેમના વાહનોમાંથી મોડીફાઇડ સાયલન્સર પણ કાઢી નાખવામાં આવ્યા હતા. પોલીસની આ કાર્યવાહીથી બુલેટમાં અનધિકૃત ફેરફાર કરાવીને ફરતા ચાલકોમાં ચિંતા જોવા મળી છે. પોલીસે સ્પષ્ટ કર્યું છે કે શહેરમાં ધ્વનિ પ્રદૂષણ અટકાવવા માટે આગામી દિવસોમાં પણ વાહન ચેકિંગ વધુ સઘન બનાવવામાં આવશે. ખાસ કરીને મોડીફાઇડ સાયલન્સર લગાવેલા બુલેટ સહિત ધ્વનિ પ્રદૂષણ કરતા અન્ય વાહનો સામે પણ કડક કાર્યવાહી ચાલુ રહેશે.