ગુજરાત શિક્ષણ સેવામાં મોટો ફેરફાર: વર્ગ-2ના 63 અધિકારીઓની બદલી:CERT સહિતની જગ્યાએ કામગીરી સોંપવામાં આવી, નવી નિમણૂકોનો તાત્કાલિક અસરથી અમલ કરાશે

ગુજરાત શિક્ષણ વિભાગ દ્વારા વહીવટી અનુકૂળતાને ધ્યાનમાં રાખીને ગુજરાત શિક્ષણ સેવા વર્ગ-2ના કુલ 63 અધિકારીઓ અને આચાર્યોની બદલી તથા કામગીરીમાં ફેરફાર કરવાના આદેશો જાહેર કરવામાં આવ્યા છે. શિક્ષણ વિભાગના તા. 8 ઓક્ટોબર, 2026ના આદેશ મુજબ નવી નિમણૂકોનો અમલ તાત્કાલિક અસરથી કરવાનો રહેશે. આ બદલીમાં સરકારી માધ્યમિક અને ઉચ્ચતર માધ્યમિક શાળાઓના આચાર્યો, મોડેલ સ્કૂલોના આચાર્યો, નાયબ જિલ્લા શિક્ષણાધિકારીઓ તેમજ શિક્ષણ નિરીક્ષકોનો સમાવેશ થાય છે. કેટલાક અધિકારીઓને એક સ્થળેથી અન્ય શાળામાં આચાર્ય તરીકે મુકવામાં આવ્યા છે, જ્યારે કેટલાકને જિલ્લા શિક્ષણ કચેરી, GCERT સહિતની જગ્યાએ કામગીરી સોંપવામાં આવી છે. કેટલાક આચાર્યોને GCERT, ગાંધીનગર ખાતે કામગીરી ફેરફારથી મુકવામાં આવ્યા છે. અનેક અધિકારીઓને જિલ્લા શિક્ષણાધિકારી/નાયબ જિલ્લા શિક્ષણાધિકારીની કચેરીઓમાં નવી જવાબદારી સોંપાઈ છે. સરકારી માધ્યમિક તથા ઉચ્ચતર માધ્યમિક શાળાઓ અને મોડેલ સ્કૂલોમાં પણ આચાર્યોની બદલી કરવામાં આવી. શિક્ષણ વિભાગના આદેશમાં જણાવ્યા મુજબ, વહીવટી અનુકૂળતાને ધ્યાને રાખીને આ તમામ બદલી/કામગીરી ફેરફારના હુકમો તાત્કાલિક અસરથી અમલમાં મૂકવામાં આવ્યા છે. આ સાથે સંબંધિત અધિકારીઓને નવી જગ્યાએ હાજર થઈને કામગીરી સંભાળવાની રહેશે.