ચાણસ્મામાં મોબાઈલ કંપનીના કેબલ વાયરની ચોરી કરનાર 3 ઝડપાયા:નેટવર્ક માટેના અંડરગ્રાઉન્ડ કામ દરમિયાન કેબલની ચોરી કરી હતી

ચાણસ્મા પોલીસે વોડાફોન કંપનીના અઢી લાખ રૂપિયાના કેબલ વાયરની ચોરીનો ભેદ ઉકેલી નાખ્યો છે. આ કેસમાં પોલીસે ચાણસ્માના ત્રણ આરોપીઓની ધરપકડ કરી ચોરાયેલો મુદ્દામાલ કબજે કર્યો છે. આ ચોરી વોડાફોનના નેટવર્ક માટેના અંડરગ્રાઉન્ડ કામ દરમિયાન થઈ હતી. આ ઘટના ચાણસ્મા-મહેસાણા હાઈવે રોડ પર સાંઈબાબાના મંદિર નજીક બની હતી. વોડાફોન કંપની દ્વારા નેટવર્ક માટે કેબલ વાયર જમીનમાં ઉતારવાની કામગીરી ચાલી રહી હતી. આ કામગીરી માટે લાવવામાં આવેલું રૂ. 2.50 લાખની કિંમતનું 4 હજાર મીટર લાંબુ કેબલ વાયરનું ડ્રમ અજાણ્યા તસ્કરો ચોરી ગયા હતા. રાધનપુરના કોન્ટ્રાકટરે આ અંગે ચાણસ્મા પોલીસ સ્ટેશનમાં ફરિયાદ નોંધાવી હતી. ચોરીના ગુનાની તપાસ દરમિયાન, ચાણસ્મા પોલીસ સ્ટેશનના અમિતસિંહ વાઘેલા અને ધનજી આચાર્યને મળેલી બાતમીના આધારે કાર્યવાહી કરાઈ હતી. પોલીસે યુક્તિપૂર્વક પૂછપરછ કરતા ચોરીનો ભેદ ઉકેલાયો હતો. પોલીસે ચાણસ્માના દીપકજી ભરતજી ઠાકોર, સાહિલ વિક્રમજી ઠાકોર અને પ્રકાશજી ભવાનજી ઠાકોર નામના ત્રણ આરોપીઓની અટકાયત કરી હતી. પૂછપરછ દરમિયાન, આરોપીઓએ કેબલ વાયરની ચોરી કરી હોવાની કબૂલાત કરી હતી. પોલીસે તેમની પાસેથી ચોરાયેલો કેબલ વાયરનો મુદ્દામાલ પણ કબજે કર્યો છે.