પાટણમાં તન્ના ટ્રેડર્સમાંથી 678 કિલો શંકાસ્પદ ચટણી સીઝ:FDCA એ કાર્યવાહી કરી, નમૂના લેબોરેટરી મોકલી નોટિસ અપાઈ

પાટણ શહેરના જૂના ગંજ બજાર વિસ્તારમાં આવેલા તન્ના ટ્રેડર્સમાંથી ખોરાક અને ઔષધ નિયમન તંત્ર (FDCA) દ્વારા 678 કિલોગ્રામ શંકાસ્પદ લાલ ચટણીનો જથ્થો સીઝ કરવામાં આવ્યો છે. આ જથ્થાની અંદાજિત કિંમત ₹20,340 આંકવામાં આવી છે. નાગરિકોના આરોગ્યની સુરક્ષા અને ગુણવત્તાસભર ખાદ્ય પદાર્થોની ઉપલબ્ધતા સુનિશ્ચિત કરવા FDCA પાટણ દ્વારા જિલ્લામાં ચકાસણી કામગીરી હાથ ધરવામાં આવી હતી. આ દરમિયાન ફૂડ સેફ્ટી ઓફિસર એલ. એન. ફોફ દ્વારા જૂના ગંજ બજાર, પોલીસ ચોકી પાછળ આવેલ મે. તન્ના ટ્રેડર્સ ખાતે તપાસ કરાઈ હતી. તપાસમાં વેચાણ અર્થે રાખેલી લાલ ચટણી શંકાસ્પદ જણાતાં ફૂડ સેફ્ટી એન્ડ સ્ટાન્ડર્ડ્સ એક્ટ-2006 હેઠળ નમૂનો લેવામાં આવ્યો હતો. આ કાર્યવાહીમાં પેઢીના જવાબદાર વ્યક્તિ રાજ હરેશભાઈ મોદી પાસેથી નમૂનો લેવાયો હતો. લેવામાં આવેલ નમૂનો લેબોરેટરી પરીક્ષણ માટે મોકલી આપવામાં આવ્યો છે. તેનો રિપોર્ટ આવ્યા બાદ આગળની કાયદેસરની કાર્યવાહી કરાશે. આ ઉપરાંત, પેઢીને સ્વચ્છતા અને જરૂરી સુધારા કરવા માટે ઇમ્પ્રુવમેન્ટ નોટિસ પણ આપવામાં આવી છે.