આજીવન કેદ ભોગવતાં રાજુ ભરવાડની જેલમુક્તિ:ભરૂચ જેલમાં 14 વર્ષથી વધુ સજા ભોગવી, સારા વર્તનથી છૂટકારો થય

ભરૂચ જિલ્લા જેલમાં આજીવન કેદની સજા ભોગવી રહેલા કેદી રાજુ અમરાભાઈ ભરવાડને સરકારના આદેશ બાદ વહેલા મુક્ત કરવામાં આવ્યા. કેદી નંબર 33642 રાજુ ભરવાડે 14 વર્ષથી વધુ સમયની સજા ભોગવી હતી. જેલ દરમિયાન તેમનું વર્તન સારું રહ્યું હોવાથી તેઓ વહેલી મુક્તિ માટે પાત્ર બન્યા. કેદીની વહેલી મુક્તિ માટે ભરૂચ જિલ્લા જેલના અધિક્ષકે ભારતીય નાગરિક સુરક્ષા સંહિતા-2023ની કલમ 473 હેઠળ કાર્યવાહી કરી હતી. આ પ્રક્રિયામાં સંબંધિત અધિકારીઓના અભિપ્રાયો અને જરૂરી કાગળો મેળવવામાં આવ્યા. ત્યારબાદ, વહેલી મુક્તિ માટેની દરખાસ્ત જેલોના વડા, પોલીસ મહાનિદેશક, જેલ અને સુધારાત્મક વહીવટ, ગુજરાત રાજ્ય, અમદાવાદ દ્વારા સરકારને મોકલવામાં આવી. સરકારે આ મામલા પર વિચાર કર્યા પછી કેદીની બાકી સજા માફ કરી દીધી. સરકારે તેમને વહેલા મુક્ત કરવાનો આદેશ આપ્યો. આ આદેશ મુજબ, રાજુભાઈ અમરાભાઈ ભરવાડને 11 સપ્ટેમ્બરે ભરૂચ જિલ્લા જેલમાંથી મુક્ત કરવામાં આવ્યા. જેલમાંથી મુક્ત થતી વખતે, ઇન્ચાર્જ અધિક્ષક એન.પી. રાઠોડે રાજુભાઈને શુભેચ્છા આપી. તેમણે રાજુભાઈને સમાજમાં સારા વર્તન સાથે ફરીથી જોડાઈને જવાબદાર નાગરિક તરીકે જીવન જીવવા કહ્યું. રાઠોડે તેમના સુખી અને ઉજ્જવળ ભવિષ્યની કામના કરીને તેમને વિદાય આપી. રાજુભાઈની વહેલી મુક્તિના સમાચાર મળતા તેમના પરિવારમાં ખુશીનો માહોલ છવાઈ ગયો. જેલમાંથી બહાર આવ્યા પછી પરિવારજનો સાથે તેમની મુલાકાત થઈ. આ સમયે ભાવુક દ્રશ્યો જોવા મળ્યા. ગુજરાત જેલ વિભાગ કેદીઓમાં શિસ્ત, સારું વર્તન, સુધારણા અને માનસિક બદલાવ લાવવા માટે કામ કરી રહ્યું છે. જેથી તેઓ સમાજમાં ફરીથી જોડાઈ શકે. આ માટે વિવિધ સુધારાત્મક અને પુનર્વસન પ્રવૃત્તિઓ ચલાવવામાં આવી રહી છે. આવી વહેલી મુક્તિની પ્રક્રિયા કેદીઓને સારા વર્તન અને સુધારણા માટે પ્રેરણા આપી શકે છે.