Ahmedabadમાં ત્યજી દેવાયેલા નવજાતને મળ્યું નવું નામ, નિકોલ પોલીસે ‘શિવાય’ નામ રાખ્યું

અમદાવાદના નિકોલ વિસ્તારમાં એસ.પી. રિંગ રોડ પર આવેલા કઠવાડા GIDC ચાર રસ્તા નજીક ખુલ્લી જગ્યામાંથી એક ત્યજી દેવાયેલું નવજાત બાળક મળી આવ્યું હતું. આ અંગેની જાણ થતાં જ નિકોલ પોલીસની ટીમ ત્વરિત ઘટનાસ્થળે પહોંચી ગઈ હતી. પોલીસે વિલંબ કર્યા વગર માસૂમ બાળકની પ્રાથમિક સુરક્ષા સુનિશ્ચિત કરીને તેને તાત્કાલિક સારવાર અર્થે સિવિલ હોસ્પિટલમાં ખસેડ્યું હતું. શી-ટીમ દ્વારા બાળકનું નામકરણ 'શિવાય' અને છઠ્ઠી પૂજન સિવિલ હોસ્પિટલના તબીબોની દેખરેખ હેઠળ સતત 10 દિવસની ગહન સારવાર બાદ બાળક સંપૂર્ણપણે સ્વસ્થ થતાં તેને હોસ્પિટલમાંથી રજા આપવામાં આવી હતી. આ પ્રસંગે નિકોલ પોલીસની 'શી-ટીમ' (She-Team) દ્વારા મમતાનું ઉત્કૃષ્ટ ઉદાહરણ પૂરું પાડવામાં આવ્યું હતું. શી-ટીમે પરંપરાગત રીતે બાળકનું 'છઠ્ઠી પૂજન' કરી, ઉષ્માભર્યું સ્વાગત કર્યું હતું અને તેનું નામ 'શિવાય' રાખીને મીઠાઈ વહેંચી આનંદ વ્યક્ત કર્યો હતો. શિશુ ગૃહમાં સુરક્ષિત ખસેડાયો, માતા-પિતાની તપાસ ચાલુ તમામ ધાર્મિક અને કાનૂની પ્રક્રિયા પૂર્ણ કર્યા બાદ, નવજાત બાળક 'શિવાય'ને આગળની યોગ્ય સંભાળ અને ઉછેર માટે પાલડી ખાતે આવેલા શિશુ ગૃહમાં સુરક્ષિત રીતે મોકલી આપવામાં આવ્યો છે. બીજી તરફ, નિકોલ પોલીસે બાળકને ખુલ્લામાં ત્યજી દેનાર નિર્દયી માતા-પિતા કે વાલીની શોધખોળ માટે આસપાસના સીસીટીવી ફુટેજ અને સ્થાનિક બાતમીદારોની મદદથી સઘન તપાસ તેજ કરી છે. આ પણ વાંચો : Vav-Tharadમાં પોલીસનો સપાટો, અલગ-અલગ સ્થળે રેડ કરી રૂ.93,800નો દારૂ ઝડપાયો