વલસાડમાં કોંગ્રેસે ‘મત બચાવો, દેશ બચાવો’ અભિયાન શરૂ કર્યું:AICC પ્રભારી મોહન જોશીએ ભાજપ સરકાર પર આકરા પ્રહારો કર્યા, 1 ડિસેમ્બરે રામલીલા મેદાનમાં આંદોલન

વલસાડ સર્કિટ હાઉસ ખાતે AICCના પ્રભારી મોહન જોશીના અધ્યક્ષ સ્થાને વલસાડ જિલ્લા કોંગ્રેસ સમિતિ દ્વારા એક વિશેષ પત્રકાર પરિષદનું આયોજન કરવામાં આવ્યું હતું. આ પરિષદમાં અખિલ ભારતીય કોંગ્રેસ મહાસમિતિ દ્વારા દેશવ્યાપી શરૂ કરવામાં આવેલા ‘મત બચાવો, દેશ બચાવો’ અભિયાન અંગે વિસ્તૃત માહિતી આપવામાં આવી હતી. અભિયાનનો મુખ્ય ઉદ્દેશ્ય અને સમયગાળો પત્રકાર પરિષદને સંબોધતા AICC પ્રભારી મોહન જોશીએ જણાવ્યું હતું કે, અખિલ ભારતીય કોંગ્રેસ મહાસમિતિ દ્વારા 1 ઓક્ટોબરથી 1 ડિસેમ્બર સુધી સમગ્ર દેશમાં ‘મત બચાવો, દેશ બચાવો’ અભિયાન ચલાવવામાં આવી રહ્યું છે. આ અભિયાનનો મુખ્ય ઉદ્દેશ્ય દેશના નાગરિકોને ભારતીય સંવિધાનના અનુચ્છેદ 326 હેઠળ મળેલા મતદાનના અધિકારને સુરક્ષિત કરવાનો અને તેમનો છીનવાયેલો મત અધિકાર પાછો અપાવવાનો છે. કેન્દ્ર અને રાજ્ય સરકાર સામે ગંભીર આરોપો તેમણે આરોપ લગાવ્યો કે, તત્કાલીન ચીફ જસ્ટિસ ચંદ્રચૂડ દ્વારા સરકારના ઈશારે નિર્ણયો આપવામાં આવ્યા છે, અને આજના સમયમાં દેશના ઈતિહાસમાં ક્યારેય ન બની હોય તેવી સ્વાતંત્ર્ય સંસ્થાઓ અને ન્યાયાલય, ચૂંટણી પંચ તથા રિઝર્વ બેંક ઓફ ઇન્ડિયા જેવી મહત્વની સંસ્થાઓમાં કેન્દ્ર સરકાર દ્વારા હસ્તક્ષેપ કરવામાં આવી રહ્યો છે. ગુજરાતની ભાજપ સરકાર પર પ્રહાર કરતા તેમણે જણાવ્યું હતું કે, ગુજરાતના મુખ્યમંત્રી માત્ર નામ પૂરતા મુખ્યમંત્રી છે, સરકાર કોણ ચલાવે છે તે જનતા સારી રીતે જાણે છે અને તેથી જ ભાજપ સરકાર દરેક મોરચે નિષ્ફળ સાબિત થઈ છે. રાજ્યમાં યુવાનોના NEET પરીક્ષાના પ્રશ્નો, મોંઘવારી, ખેડૂતોની દયનીય સ્થિતિ અને અન્ય મુદ્દાઓ પર સરકારની નિષ્ફળતા જગજાહેર છે. વિપક્ષના નેતા રાહુલ ગાંધીએ પુરાવાઓ સાથે સરકારની ચોરી અને નિષ્ફળતાઓને ઉજાગર કરી છે. રામલીલા મેદાનમાં યુવતીઓની સુરક્ષા અને ન્યાય માટે થયેલા આંદોલનો અને અત્યાચારોને દેશની જનતા ભૂલી નથી, અને તેનો યોગ્ય જવાબ આવનારી ચૂંટણીઓમાં આપશે. રાહુલ ગાંધીના નેતૃત્વમાં રામલીલા મેદાનમાં વિશાળ રેલી આગામી સમયમાં વિપક્ષના નેતા રાહુલ ગાંધીના નેતૃત્વમાં 1 નવેમ્બરના રોજ રામલીલા મેદાન ખાતે 'ઈન્ડિયા' ગઠબંધન દ્વારા એક વિશાળ રેલીનું આયોજન કરવામાં આવ્યું છે, જેમાં વલસાડ જિલ્લામાંથી કોંગ્રેસના તમામ કાર્યકર્તાઓ મોટા પ્રમાણમાં જોડાશે.