અમરેલીમાં સાંસદ ભરત સુતરિયાના હસ્તે સરસ મેળો ખુલ્લો મુકાયો:35 સ્ટોલ દિવાળી ખરીદીનું મુખ્ય આકર્ષણ બન્યા;જય ઠાકરધણી જૂથને ₹6.50 લાખની કેશ ક્રેડિટ લોન અપાઈ

ભારત સરકાર અને ગુજરાત સરકારના સંયુક્ત ઉપક્રમે ગુજરાત લાઈવલીહુડ પ્રમોશન કંપની લિમિટેડ દ્વારા આયોજિત 'સરસ મેળા-2026'નો અમરેલીના સાંસદ ભરત સુતરિયાના હસ્તે શુભારંભ કરવામાં આવ્યો છે. આ પ્રસંગે જિલ્લાના અગ્રણી અતુલ કાનાણી સહિત સ્થાનિક પદાધિકારીઓ વિશેષ ઉપસ્થિત રહ્યા હતા. આ મેળો 28 ઓક્ટોબરથી 4 નવેમ્બર સુધી ચાલશે, જેમાં સ્વસહાય જૂથની બહેનો દ્વારા તૈયાર કરાયેલી વસ્તુઓનું સીધું વેચાણ થશે. 35 સ્ટોલ અને કેશ ક્રેડિટ લોનની સહાય સરસ મેળામાં આશરે 30 ક્રાફ્ટ સ્ટોલ અને 5 લાઈવ ફૂડ સ્ટોલ સહિત કુલ 35 સ્ટોલનું સુઆયોજિત આયોજન કરવામાં આવ્યું છે. કાર્યક્રમ દરમિયાન 'દીન દયાળ અંત્યોદય' યોજના અંતર્ગત જય ઠાકરધણી આજીવિકા મંડળને ₹6,50,000 ની કેશ ક્રેડિટ લોનનો ચેક સાંસદના હસ્તે અર્પણ કરવામાં આવ્યો હતો. આ આયોજનથી સખી મંડળની બહેનોને પોતાની કલા રજૂ કરવાનું મજબૂત મંચ મળ્યું છે. દિવાળી ખરીદી માટે ઉત્તમ પ્લેટફોર્મ ઉદ્ઘાટન બાદ સાંસદ ભરત સુતરિયાએ વિવિધ સ્ટોલની મુલાકાત લઈને બહેનો સાથે સંવાદ સાધ્યો હતો. મેળામાં સખી મંડળ દ્વારા નિર્મિત હેન્ડીક્રાફ્ટ, હેન્ડલૂમ, ખાદ્ય પદાર્થો, દિવાળી ડેકોરેશન, દીવા, રંગોળી સામગ્રી અને પરંપરાગત વસ્ત્રો ઉપલબ્ધ કરાવવામાં આવ્યા છે. સાંસદ દ્વારા નાગરિકોને મેળાની મુલાકાત લઈ બહેનો દ્વારા ઉત્પાદિત વસ્તુઓની ખરીદી કરીને પ્રોત્સાહન પૂરું પાડવા ખાસ અપીલ કરવામાં આવી છે. અધિકારીઓ અને સખી મંડળની ઉપસ્થિતિ મહિલાઓને આર્થિક રીતે પગભર બનાવવાના ઉમદા હેતુસર દર વર્ષે યોજાતો આ મેળો ગ્રામ્ય ઉત્પાદનોને ગ્રાહકો સુધી પહોંચાડવાનું શ્રેષ્ઠ માધ્યમ બન્યો છે. આ પ્રસંગે જિલ્લા વિકાસ અધિકારી કે.જે. જાડેજા (ઇ.ચા.), વિવિધ વિભાગના અધિકારીઓ તેમજ મોટી સંખ્યામાં સ્વસહાય જૂથની સખી મંડળની બહેનો અને સ્થાનિક નાગરિકો વિશેષ ઉપસ્થિત રહ્યા હતા.