બેંક ખાતામાં 54,00,000 રોકડા જમા કર્યા છતાંય ન લાગ્યો ટેક્સ! જાણો પ્રોપર્ટી ડીલરે કઈ રીતે કેસ જીત્યો

Income Tax ITAT Ruling: ઈન્કમટેક્સ વિભાગની નોટિસ આવે એટલે ભલભલા વેપારીઓના પરસેવા છૂટી જાય છે, પરંતુ દિલ્હીના એક પ્રોપર્ટી ડીલરે હિંમત હાર્યા વિના લડત આપી. પોતાના બેંક ખાતામાં 54 લાખ રૂપિયા રોકડા જમા કરાવ્યા હોવા છતાં, તેણે તેની પર એક પણ રૂપિયો ટેક્સ ચૂકવવો પડ્યો નહીં. ચાલો જાણીએ કે આ આવકવેરાનો કેસ તે કેવી રીતે જીત્યો અને આખી ઘટના શું હતી.

શું હતો આખો મામલો?

આ કેસ નાણાકીય વર્ષ 2011-12 નો છે. દિલ્હી સ્થિત એક પ્રોપર્ટી ડીલરના બેંક ખાતામાં એકસાથે 54 લાખ રૂપિયા રોકડા જમા થયા. આટલી મોટી રકમ જોઈને આવકવેરા (ઈન્કમટેક્સ) વિભાગ હરકતમાં આવ્યું અને વિભાગે ડીલરને નોટિસ ફટકારવાનું શરૂ કર્યું. શરૂઆતમાં ડીલર તરફથી કોઈ જવાબ ન મળતા, આકારણી અધિકારી (Assessing Officer) એ આ 54 લાખ રૂપિયાને ડીલરની છુપી કે 'અઘોષિત આવક' માની લીધી અને તેને ટેક્સના દાયરામાં ઉમેરી દીધી.

ડીલરે આ રીતે સાબિત કરી પોતાની સચ્ચાઈ

ટેક્સની નોટિસ મળ્યા પછી ડીલર ચૂપ ન બેઠો. તેણે દિલ્હીના આવકવેરા અપીલ ટ્રિબ્યુનલ (ITAT) નો દરવાજો ખખડાવ્યો. તેણે કોર્ટ સામે સ્પષ્ટતા કરી કે આ પૈસા તેની કમાણી નથી. તે માત્ર પ્રોપર્ટીના સોદાઓમાં એક દલાલ (Broker) તરીકે કામ કરે છે. ખાતામાં જમા થયેલા પૈસા ખરીદદારો પાસેથી મળ્યા હતા, જે તેણે બેંકમાં જમા કરાવીને સીધા મિલકત માલિકો (વેચનારાઓ) ને વહેંચી દીધા હતા.

પોતાની વાતને સાચી સાબિત કરવા માટે ડીલરે પાક્કા પુરાવા રજૂ કર્યા. જેમાં બેંકના સ્ટેટમેન્ટ, ખરીદનાર અને વેચનાર બંને પક્ષના સોગંદનામા (Affidavits) અને મિલકત વેચાણના અસલી દસ્તાવેજો સામેલ હતા. ITAT એ આ તમામ પુરાવાઓ માન્ય રાખ્યા અને 54 લાખ રૂપિયા પર લગાવેલો ટેક્સ સંપૂર્ણપણે માફ કરી દીધો.

અન્ય વેપારીઓ માટે આ છે મોટો બોધપાઠ

આ કિસ્સો અન્ય પ્રોપર્ટી ડીલરો અને વેપારીઓ માટે આંખ ઉઘાડનારો છે. બેંક ખાતામાં લાખો રૂપિયા જમા થાય એટલે તે તમારી આવક જ છે તેવું માની લેવાય નહીં. ખરી વાત એ છે કે, તે પૈસા કોના હતા અને કયા કારણસર લેવાયા હતા તે સાબિત થવું જોઈએ. જો કોઈ ડીલર ગ્રાહક પાસેથી 50 લાખ રૂપિયા લે છે અને સાબિત કરી આપે છે કે આ પૈસા વેચનારને આપવા માટે જ લીધા હતા, તો તે ડીલરની આવક ગણાશે નહીં. પરંતુ, આના માટે કાગળ પર મજબૂત પુરાવા હોવા અત્યંત જરૂરી છે, જેમ કે:

ખરીદનાર કે વેચનાર સાથેનો લેખિત કરાર (Agreement) અથવા ઓથોરિટી લેટર.

ખરીદનાર અને વેચનારના નામ તેમજ PAN નંબરની વિગતો.

પ્રોપર્ટીની સંપૂર્ણ અને સાચી માહિતી.

પૈસા મળ્યાની રોકડ રસીદ (Cash receipt).

કેશ બુક કે ખાતાવહીમાં થયેલી પ્રોપર એન્ટ્રી.

પૈસા જેમને ચૂકવવામાં આવ્યા છે તેનો સંપૂર્ણ રેકોર્ડ.

બેંક સ્ટેટમેન્ટમાં પૈસા આવ્યા (Inflow) અને ગયા (Outflow) નો સ્પષ્ટ હિસાબ.

પૈસા લેનાર વ્યક્તિની સહીવાળી પહોંચ કે રસીદ.