બેઠકમાં ખાતરી અપાઈ:થરા નાગરિક શરાફી સહકારી મંડળીના દરેક થાપણદારોને એક મહિનામાં નાણાં પરત મળશે

બનાસકાંઠા જિલ્લાના નવરચિત ઓગડ તાલુકાના વેપારી મથક થરામાં આવેલી ધી થરા વિભાગ નાગરિક શરાફી સહકારી મંડળી લિ.માં કરોડો રૂપિયાની થાપણો ફસાતાં 400થી વધુ થાપણદારોમાં ચિંતા અને આક્રોશનો માહોલ સર્જાયો છે. મંડળીનું કામકાજ લાંબા સમયથી બંધ રહેતાં પોતાની જીવનભરની બચત અને મહેનતની કમાણી જમા કરાવનારા લોકો મુશ્કેલીમાં મુકાયા છે. ત્યારે તાણા ગામે ચામુંડા માતાજીના મંદિર ખાતે મંડળીના ડિરેક્ટરો અને થાપણદારોની બેઠકમાં એક માસમાં નાણા પરત આપવાનો નિર્ણય લેવાયો હતો. બેઠકમાં મોટી સંખ્યામાં થાપણદારો સાથે મંડળીના તમામ ડિરેક્ટરો ઉપસ્થિત રહ્યા હતા. આ દરમિયાન થાપણદારોએ પોતાની ફિક્સ ડિપોઝિટ સહિતની જમા રકમ પરત મેળવવા અંગે ઉગ્ર રજૂઆતો કરી હતી. મંડળીમાં નાણાં જમા કરાવ્યા બાદ લાંબા સમયથી પરત ન મળતાં અનેક પરિવારોની આર્થિક મુશ્કેલીઓ વધી હોવાની રજૂઆત પણ કરવામાં આવી હતી. બેઠકના અંતે થાપણદારોનાં નાણાં પરત મળે તે માટે ખાસ કમિટી બનાવવાનો નિર્ણય લેવામાં આવ્યો હતો. પ્રથમ તબક્કામાં મંડળીમાં કોના કેટલા નાણાં જમા છે તેની સંપૂર્ણ ચકાસણી કરી હિસાબો અને થાપણોની વિગતો એકત્રિત કરવામાં આવશે. ત્યારબાદ નાણાં પરત કરવાની પ્રક્રિયા હાથ ધરાશે. ખાસ કરીને આર્થિક રીતે નબળા અને તાત્કાલિક નાણાંની જરૂરિયાત ધરાવતા થાપણદારોને પ્રાથમિકતા આપવાની ખાતરી પણ આપવામાં આવી હતી.