ભાવનગર રેલવે મંડળમાં સ્વચ્છતા શપથ કાર્યક્રમ યોજાયો:200 અધિકારી-કર્મચારીઓએ સ્વચ્છતાનો સંકલ્પ લીધો, DRM દિનેશ વર્માએ માર્ગદર્શન આપ્યું

ભારત સરકારના આવાસન અને શહેરી કાર્ય મંત્રાલય તથા જળ શક્તિ મંત્રાલયના નિર્દેશ અનુસાર 'સ્વચ્છતા હી સેવા (SHS)-2026' અભિયાન 17 સપ્ટેમ્બરથી 2 ઓક્ટોબર 2026 સુધી ચાલી રહ્યું છે. આ વર્ષની થીમ "સ્વચ્છતામાં સહભાગ; સ્વચ્છ ભારત, વિકસિત ભારત" છે. આ અભિયાન અંતર્ગત ભાવનગર રેલવે મંડળમાં 17 સપ્ટેમ્બર, 2026ના રોજ સ્વચ્છતા શપથ કાર્યક્રમ યોજાયો હતો. આ કાર્યક્રમ મંડળ રેલ પ્રબંધક (DRM) દિનેશ વર્માના માર્ગદર્શન હેઠળ અને વરિષ્ઠ મંડળ યાંત્રિક ઇજનેર એસ. કે. મિશ્રાના નિર્દેશનમાં યોજાયો હતો. મુખ્ય સ્વચ્છતા શપથ કાર્યક્રમ DRM કચેરી સામેના લૉનમાં સવારે 10:30 કલાકે યોજાયો હતો. તેમાં લગભગ 200 અધિકારીઓ અને કર્મચારીઓએ ઉત્સાહપૂર્વક ભાગ લીધો હતો. આ પ્રસંગે સૌએ સ્વચ્છતા પ્રત્યે જાગૃત રહેવા, પોતે ગંદકી ન કરવા, અન્ય લોકોને પણ ગંદકી ન કરવા દેવા તેમજ પોતાની કચેરી, કાર્યસ્થળ, ઘર અને આસપાસના વિસ્તારોને સ્વચ્છ રાખવાની શપથ લીધી હતી. આ પ્રસંગે DRM દિનેશ વર્માએ અધિકારીઓ અને કર્મચારીઓને 'સ્વચ્છતા હી સેવા-2026' અંતર્ગત યોજાનારી વિવિધ સ્વચ્છતા અને જનજાગૃતિ પ્રવૃત્તિઓ વિશે માર્ગદર્શન આપ્યું હતું. 'સ્વચ્છતા હી સેવા-2026' અંતર્ગત ભાવનગર મંડળમાં 17 સપ્ટેમ્બરથી 2 ઓક્ટોબર 2026 સુધી અલગ અલગ તબક્કામાં મોટા પાયે સ્વચ્છતા અને જનભાગીદારીની પ્રવૃત્તિઓનું આયોજન કરવામાં આવશે. તેમાં સ્વચ્છ સ્ટેશન, સ્વચ્છ રેલગાડી અને સ્વચ્છ રેલવે પરિસર, કચરાનું વિભાજન, જળ સંરક્ષણ, પ્લાસ્ટિકનો ઓછો ઉપયોગ, જનજાગૃતિ, શ્રમદાન તથા અન્ય સ્વચ્છતા સંબંધિત પ્રવૃત્તિઓનો સમાવેશ થાય છે. ભાવનગર મંડળના અલગ અલગ સ્ટેશનો, કોચિંગ ડેપો, યાર્ડ, રેલવે કોલોનીઓ, કચેરીઓ તથા અન્ય કાર્યસ્થળો પર ખાસ સ્વચ્છતા અભિયાન ચલાવવામાં આવશે. આ અભિયાન અંતર્ગત 'સ્વચ્છ પાઠશાળા – યુવા ફોર સ્વચ્છતા' પહેલ દ્વારા વિદ્યાર્થીઓ અને યુવાનોને સ્વચ્છતા પ્રત્યે જાગૃત કરવામાં આવશે. ભાવનગર મંડળ દ્વારા રેલવે કર્મચારીઓ અને તેમના પરિવારો, સ્થાનિક સમુદાય, સ્વૈચ્છિક સંસ્થાઓ તથા અન્ય લોકોની સક્રિય ભાગીદારી દ્વારા સ્વચ્છતાને જનભાગીદારી આધારિત જનઆંદોલન બનાવવાનો પ્રયાસ થઈ રહ્યો છે. સ્વચ્છ અને પર્યાવરણમૈત્રી રેલવે પરિસરોના નિર્માણ માટે સામૂહિક પ્રયાસોને સતત પ્રોત્સાહન આપવામાં આવશે. "સ્વચ્છતામાં સહભાગ; સ્વચ્છ ભારત, વિકસિત ભારત"ના સંદેશ સાથે ભાવનગર મંડળે તમામ સ્ટેશનો પર સ્વચ્છતા પર ભાર મૂક્યો હતો.