ચાંચબંદર દરિયા કાંઠે ગણેશ વિસર્જનમાં 4 ડૂબ્યાં, 3નો બચાવ:સ્થાનિકોએ 3 યુવકને બચાવી લીધા, એકની શોધખોળ ચાલુ

અમરેલી જિલ્લાના રાજુલા તાલુકાના ચાંચબંદર દરિયાકાંઠે ગણેશ વિસર્જન દરમિયાન એક દુર્ઘટના બની. જેમાં ચાર યુવકો દરિયામાં ડૂબી ગયા હતા. સ્થાનિક લોકોની મદદથી ત્રણ યુવકોને બચાવી લેવાયા છે, જ્યારે એક યુવક હજુ લાપતા છે. આ ઘટના ગણેશ મૂર્તિનું વિસર્જન કરતી વખતે બની હતી. ઘટનાની જાણ થતા જ મામલતદાર, TDO અને પીપાવાવ મરીન પોલીસ સહિતનો તંત્રનો કાફલો તાત્કાલિક ઘટનાસ્થળે પહોંચ્યો હતો. લાપતા યુવક વીરસીંગભાઈ જેરામભાઈ ગુજરીયાની શોધખોળ સ્થાનિક તરવૈયાઓ અને લોકોની મદદથી શરૂ કરાઈ છે. પીપાવાવ ઇન્ડિયન કોસ્ટગાર્ડને પણ જાણ કરાઈ છે, જેથી દરિયામાં શોધખોળ વધુ તેજ બની છે. આ ઘટનાથી ચાંચબંદર ગામ સહિત આસપાસના વિસ્તારમાં ચિંતાનો માહોલ છે.