દમણમાં દરિયામાં ડૂબતાં યુવકનું રેસ્ક્યૂ, VIDEO:ગણેશ વિસર્જન દરમિયાન યુવક ઊંડા પાણી તરફ ખેંચાયો, લાઇફગાર્ડે બચાવ્યો

વલસાડ જિલ્લાને અડીને આવેલા કેન્દ્રશાસિત પ્રદેશ દમણમાં મંગળવારે ગણેશ વિસર્જન દરમિયાન મોટી દુર્ઘટના ટળી હતી. સમુદ્ર નારાયણ જેટી પર ગણપતિની પ્રતિમા સાથે પાણીમાં ઉતરેલો એક યુવક અચાનક તેજ લહેરોની ચપેટમાં આવી ગયો હતો. પાણીનો પ્રવાહ વધુ હોવાથી યુવક પોતાનો કાબૂ ગુમાવી ડૂબવા લાગ્યો હતો. આ ઘટનાને પગલે જેટી પર હાજર લોકોમાં અફરાતફરી મચી ગઈ હતી. યુવક ઊંડા પાણી તરફ ખેંચાયો ગણેશ વિસર્જન માટે મોટી સંખ્યામાં લોકો સમુદ્ર નારાયણ જેટી પર પહોંચ્યા હતા. આ દરમિયાન એક યુવક ગણપતિની પ્રતિમા સાથે સમુદ્રના પાણીમાં ઉતર્યો હતો. જોકે, અચાનક આવેલી તેજ લહેરોના કારણે તે ઊંડા પાણી તરફ ખેંચાઈ ગયો હતો અને ડૂબવા લાગ્યો હતો. યુવકને ડૂબતો જોઈ આસપાસના લોકોએ બૂમાબૂમ કરી મદદ માટે પોકાર કરી હતી. લાઇફગાર્ડે સમુદ્રમાં છલાંગ લગાવી યુવક ડૂબી રહ્યો હોવાની જાણ થતાં જેટી પર ફરજ બજાવી રહેલા લાઇફગાર્ડે સમય ગુમાવ્યા વિના સમુદ્રમાં છલાંગ લગાવી હતી. ભારે લહેરો વચ્ચે લાઇફગાર્ડ યુવક સુધી પહોંચ્યો હતો અને તેને સુરક્ષિત રીતે બહાર કાઢ્યો હતો. સમયસર હાથ ધરાયેલા રેસ્ક્યૂ ઓપરેશનના કારણે યુવકનો જીવ બચી ગયો હતો. પોલીસની મદદથી હોસ્પિટલ ખસેડાયો યુવકને સમુદ્રમાંથી બહાર કાઢ્યા બાદ દમણ પોલીસે પણ તાત્કાલિક કામગીરી હાથ ધરી હતી. યુવકને પોલીસ વાન મારફતે સારવાર માટે દમણ સિવિલ હોસ્પિટલ ખાતે ખસેડવામાં આવ્યો હતો. હોસ્પિટલમાં તબીબોએ તેની સારવાર શરૂ કરી હતી. લાઇફગાર્ડની સતર્કતાથી મોટી દુર્ઘટના ટળી ગણેશ વિસર્જન દરમિયાન બનેલી આ ઘટનાથી થોડા સમય માટે સમુદ્ર નારાયણ જેટી પર ચિંતા પ્રસરી હતી. જોકે, લાઇફગાર્ડની સતર્કતા અને ત્વરિત રેસ્ક્યૂના કારણે મોટી દુર્ઘટના ટળી હતી.