જંબુસર 2021 ઘરફોડ ચોરીનો ભેદ ઉકેલાયો:વડોદરાથી રીઢો આરોપી ઝડપાયો, 20થી વધુ ગુના નોંધાયેલા

ભરૂચ લોકલ ક્રાઇમ બ્રાન્ચ (LCB) એ જંબુસરમાં વર્ષ 2021માં થયેલી ઘરફોડ ચોરીનો ભેદ ઉકેલ્યો છે. LCB એ વડોદરાથી એક રીઢા આરોપી નિહાલ રાજેન્દ્રકુમાર બારોટને ઝડપી પાડ્યો છે. ટેકનિકલ સર્વેલન્સ અને હ્યુમન ઇન્ટેલિજન્સના આધારે LCB ટીમે આરોપી નિહાલ બારોટ (રહે. અલમદીના રેસિડેન્સી, વડોદરા) ને વડોદરાના વાસણા-ભાયલી રોડ પર આવેલા એમ્પાયરિયલ હાઇટ્સ પાસેથી પકડ્યો હતો. આરોપી સામે વડોદરા શહેર સહિતના વિવિધ પોલીસ મથકોમાં ચોરી અને ઘરફોડ ચોરીના 20થી વધુ ગુના નોંધાયેલા છે. પોલીસ પૂછપરછમાં આરોપીએ કબૂલ્યું હતું કે તેણે નવેમ્બર 2021માં એક્ટિવા પર જંબુસર આવી વિવિધ સોસાયટીઓમાં રેકી કરી હતી. ત્યારબાદ રેલવે સ્કૂલ પાછળની પંચશીલ સોસાયટીના એક બંધ મકાનનું તાળું તોડી ચોરી કરી હતી. આરોપીએ કબાટમાંથી આશરે બે તોલાનો સોનાનો હાર-એરિંગ અને સુટકેસમાં રાખેલા રૂ.50 હજાર રોકડની ચોરી કરી હતી. LCB એ આરોપી પાસેથી રૂ.5 હજાર રોકડા અને રૂ.10 હજારની કિંમતનો સેમસંગ મોબાઈલ મળી કુલ રૂ.15 હજારનો મુદ્દામાલ કબજે કર્યો છે. આરોપીને આગળની કાર્યવાહી માટે જંબુસર પોલીસને સોંપવામાં આવ્યો છે.