દિલ્હી હાઈકોર્ટે JNU પ્રોફેસરની બરતરફી પર રોક લગાવી:અંગોમચા બિમોલ મણિપુરથી કોંગ્રેસના સાંસદ પણ, 11 વિદ્યાર્થિનીઓના જાતીય શોષણનો આરોપ

દિલ્હી હાઈકોર્ટે સોમવારે કોંગ્રેસના સાંસદ અને JNUના પ્રોફેસર અંગોમચા બિમોલ અકોઈજામની બરતરફી પર રોક લગાવી દીધી. જસ્ટિસ અનુપ જે. ભંભાણીએ અકોઈજામની અરજી પર યુનિવર્સિટીને નોટિસ જાહેર કરી. અકોઈજામે બરતરફીના આદેશને પડકાર્યો હતો. કોર્ટે આ કેસની આગામી સુનાવણી જાન્યુઆરીમાં નક્કી કરી છે. અકોઈજામ ઈનર મણિપુર લોકસભા બેઠક પરથી કોંગ્રેસના સાંસદ છે. તેઓ JNUની સ્કૂલ ઑફ સોશિયલ સાયન્સિસમાં પ્રોફેસર હતા. અહેવાલો અનુસાર, મે મહિનામાં ઓછામાં ઓછી 11 વિદ્યાર્થિનીઓએ પ્રોફેસર વિરુદ્ધ જાતીય ઉત્પીડનની ફરિયાદો નોંધાવી હતી. 9 ઑક્ટોબરે JNUએ આંતરિક તપાસમાં તેમને દોષિત ઠેરવીને બરતરફ કરી દીધા હતા. અકોઈજામનો દાવો- તપાસ પૂર્ણ થઈ હોવાનો ઈમેલ મળ્યો, રિપોર્ટ નહીં અકોઈજામે કહ્યું હતું કે તેમને 9 ઓક્ટોબરે JNUની આંતરિક સમિતિ (IC) તરફથી ઈમેલ મળ્યો હતો. તેમાં જણાવાયું હતું કે જાતીય સતામણીના આરોપોની તપાસ પૂર્ણ થઈ ગઈ છે. તેમણે કહ્યું કે સમિતિએ પોતાના તારણો અને ભલામણો ધરાવતો રિપોર્ટ આપવાનો હતો, પરંતુ તેમને આ રિપોર્ટ મળ્યો નથી. સાંસદે દાવો કર્યો કે તપાસ રિપોર્ટ ફરિયાદી અને જવાબદાર પક્ષ, બંનેને આપવામાં આવવો જોઈએ હતો. તેમના કહેવા મુજબ, રિપોર્ટ મળ્યા બાદ બંને પક્ષોને અસંમતિ વ્યક્ત કરવા અને અપીલ કરવા માટે 30 દિવસનો સમય મળે છે. તેમણે કહ્યું કે રિપોર્ટ ન મળવાથી તેમના કાનૂની અધિકારો પ્રભાવિત થયા. અકોઈજામના જણાવ્યા મુજબ, 9 ઑક્ટોબરે તપાસ પૂર્ણ થયાની જાણકારી મળ્યાના થોડા જ કલાકોમાં JNUના વાઇસ ચાન્સેલરે તેમને સેવામાંથી બરતરફ કરવાનો આદેશ જારી કરી દીધો. તેમણે આ આરોપોને નકારી કાઢતાં તેને રાજકીય ષડયંત્ર અને રાજકીય રીતે પ્રેરિત કાર્યવાહી ગણાવી. નિયમો તોડવાનો આરોપ કોંગ્રેસ નેતાએ યુનિવર્સિટી પ્રશાસન પર કાયદા હેઠળ ગોપનીયતાના નિયમો તોડવાનો આરોપ મૂક્યો. તેમણે કહ્યું કે તેમનું નામ સમય પહેલાં લીક કરવામાં આવ્યું, જેથી લોકોમાં તેમની વિરુદ્ધનું વાતાવરણ ઊભું કરી શકાય. સાંસદે મીડિયા ટ્રાયલનો પણ આરોપ મૂક્યો. તેમણે કહ્યું, “મીડિયામાં જ કેસ ચલાવવામાં આવ્યો અને દેશમાં, ખાસ કરીને મુખ્ય ભૂમિ પર, દરેક જણ તેને સાચું માની રહ્યું છે.” 11 વિદ્યાર્થીનીઓએ લગાવ્યા હતા આરોપ, FIR નોંધાઈ JNU પ્રશાસને અકોઈજામ વિરુદ્ધ જાતીય ઉત્પીડનથી બચાવના માળખા હેઠળ કાર્યવાહી શરૂ કરી હતી. અકોઈજામ જવાહરલાલ નેહરુ યુનિવર્સિટીના સ્કૂલ ઑફ સોશિયલ સાયન્સિસના સેન્ટર ફોર ધ સ્ટડી ઑફ સોશિયલ સિસ્ટમ્સ સાથે જોડાયેલા પ્રોફેસર હતા. યુનિવર્સિટીએ 9 ઑક્ટોબરે તેમને તાત્કાલિક અસરથી સેવામાંથી બરતરફ કરી દીધા હતા. આદેશમાં કહેવામાં આવ્યું હતું કે JNUની આંતરિક સમિતિએ તપાસના તારણોના આધારે તેમની વિરુદ્ધ મોટી સજાની ભલામણ કરી હતી. જવાહરલાલ નેહરુ યુનિવર્સિટીના ચીફ સિક્યોરિટી ઓફિસરની ફરિયાદ પર દિલ્હી પોલીસે FIR નોંધાવી. FIR 11 ઓક્ટોબરે વસંત કુંજ નોર્થ પોલીસ સ્ટેશનમાં નોંધવામાં આવી હતી. પોલીસે ભારતીય ન્યાય સંહિતા (BNS)ની કલમ 75, 75(1)(i), 75(1)(iv) અને 79 હેઠળ કેસ નોંધ્યો. પોલીસે જણાવ્યું કે મામલાની વધુ તપાસ ચાલી રહી છે.