ખેમપુરમાં રૂ. 1.53 લાખનો વિદેશી દારૂ ઝડપાયો:605 બોટલ સાથે એક આરોપીની ધરપકડ

મહીસાગર જિલ્લાના કોઠંબા પોલીસ સ્ટેશન વિસ્તારમાં એલ.સી.બી.એ મોટી કાર્યવાહી કરી છે. ખેમપુર ગામે એક ખેતરમાંથી રૂ. 1,53,094ની કિંમતનો વિદેશી દારૂનો જથ્થો ઝડપી પાડવામાં આવ્યો છે. આ કાર્યવાહીમાં 605 બોટલ વિદેશી દારૂ સાથે એક આરોપીની ધરપકડ કરવામાં આવી છે. મહીસાગર એલ.સી.બી.ને મળેલી ચોક્કસ બાતમીના આધારે આ દરોડો પાડવામાં આવ્યો હતો. દરોડા દરમિયાન અલગ-અલગ બ્રાન્ડની વિદેશી દારૂની કુલ 605 બોટલ મળી આવી હતી, જેને ખેતરમાં સંતાડી રાખવામાં આવી હતી. પોલીસે ખેમપુર ગામના ડાહ્યા પ્રતાપભાઇ બારીયા નામના આરોપીને ઝડપી પાડ્યો છે. બાતમી અનુસાર, આરોપી પોતાના ખેતરમાં વિદેશી દારૂ સંતાડી રાખી તેનું વેચાણ કરતો હતો. આ સમગ્ર મામલે કોઠંબા પોલીસ સ્ટેશન ખાતે પ્રોહિબીશન એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. મહીસાગર એલ.સી.બી.ની આ કામગીરીને કારણે જિલ્લામાં ગેરકાયદે દારૂનું વેચાણ અને હેરાફેરી કરતા તત્વોમાં ફફડાટ ફેલાયો છે.