કોને મળશે ભાજપની ટિકિટ? પૂર્ણેશ મોદી સહિત 3 નિરીક્ષકો ગાંધીનગરમાં સાંભળશે દાવેદારોને

Gandhinagar municipal corporation election: ગાંધીનગર મહાનગરપાલિકાની આગામી ચૂંટણી માટે રાજકીય ગરમાવો તેજ બન્યો છે. ભારતીય જનતા પાર્ટી (ભાજપ) દ્વારા ચૂંટણીને અનુલક્ષીને તૈયારીઓ શરૂ કરી દેવામાં આવી છે. આવતીકાલે, 21મી સપ્ટેમ્બરના રોજ ભાજપના ત્રણ નિરીક્ષકો ગાંધીનગર મહાનગરપાલિકાની ચૂંટણી લડવા ઇચ્છુક ઉમેદવારોને સાંભળશે. આ સાથે જ થરા અને ઓખા નગરપાલિકાની ચૂંટણી માટે પણ દાવેદારોને સાંભળવાની પ્રક્રિયા હાથ ધરવામાં આવશે.

ગાંધીનગર મહાનગરપાલિકાની 11 વોર્ડની 44 બેઠકો માટે આગામી 11મી ઓક્ટોબરે મતદાન યોજાવાનું છે. આ ચૂંટણી માટે 21મી સપ્ટેમ્બરથી ઉમેદવારી પત્રો ભરવાની ઔપચારિક પ્રક્રિયાનો પ્રારંભ થવા જઈ રહ્યો છે. ઉમેદવારોની પસંદગી પ્રક્રિયાને પારદર્શક અને સુચારુ રૂપે ચલાવવા માટે ગુજરાત પ્રદેશ ભાજપ દ્વારા ત્રણ અનુભવી નેતાઓની નિરીક્ષક તરીકે નિમણૂક કરવામાં આવી છે. આ જવાબદારી પૂર્વ મંત્રી અને ગુજરાત વિધાનસભાના ઉપાધ્યક્ષ પૂર્ણેશ મોદી, શબ્દશરણ બ્રહ્મભટ્ટ અને દુષ્યંત પટેલને સોંપવામાં આવી છે.

આવતીકાલે ગાંધીનગર શહેરમાં ત્રણ અલગ-અલગ સ્થળોએ સેન્સ પ્રક્રિયાનું આયોજન કરવામાં આવ્યું છે. રાયસણ, સેક્ટર 16 અને સેક્ટર 28 ખાતે નિરીક્ષકો ટિકિટ વાંચ્છુકોની રજૂઆતો સાંભળશે અને તેમની યોગ્યતા ચકાસશે. આ સેન્સ પ્રક્રિયા બાદ સ્ક્રૂટીની (ચકાસણી) કરવામાં આવશે અને દરેક બેઠક માટે 3 નામોની પેનલ તૈયાર કરી ભાજપના પાર્લામેન્ટ્રી બોર્ડને અંતિમ મંજૂરી માટે મોકલી આપવામાં આવશે.

સ્થાનિક સ્વરાજ્યની આ ચૂંટણીઓને ધ્યાનમાં રાખીને ભાજપે પોતાની તમામ પ્રક્રિયાઓની ગતિ વધારી દીધી છે અને ઉમેદવાર પસંદગીમાં કોઈપણ કચાસ ન રહે તે માટે કમર કસી છે. આ ચૂંટણીઓ રાજકીય પક્ષો માટે મહત્વની સાબિત થશે અને તે માટેની કવાયત હવે અંતિમ ચરણમાં પ્રવેશી રહી છે.

ક્યારે યોજાશે ચૂંટણી

આગામી 11 ઓક્ટોબરના રોજ ગાંધીનગર મનપા માટે મતદાન યોજાશે અને 13 ઓક્ટોબરે ચૂંટણીનાં પરિણામો જાહેર કરવામાં આવશે. લોકશાહીના આ પર્વમાં ઉમેદવારી ફોર્મ ભરવાની છેલ્લી તારીખ 26 સપ્ટેમ્બર નક્કી કરવામાં આવી છે. આ સાથે જ રાજ્યમાં 3 તાલુકા પંચાયતોની પેટાચૂંટણી અને ઓખા, ભાણવડ તેમજ થરા નગરપાલિકાની ચૂંટણીઓ પણ યોજાવાની જાહેરાત કરવામાં આવી છે.

ગાંધીનગર મહાનગરપાલિકાના કુલ 11 વોર્ડની 44 બેઠકો માટે આ ચૂંટણી જંગ ખેલાશે.

ગાંધીનગરમાં કુલ 2,56,443 નોંધાયેલા મતદારો પોતાના મતાધિકારનો ઉપયોગ કરશે.

મતદાન પ્રક્રિયાને શાંતિપૂર્ણ અને સુગમ બનાવવા સમગ્ર શહેરમાં કુલ 295 મતદાન મથકો ઊભા કરવામાં આવશે.

નાગરિકો સવારે 7 વાગ્યાથી સાંજે 6 વાગ્યા સુધી મતદાન કરી શકશે.