ગોધરામાં બિસ્કિટ ઉતારતાં ટ્રકચાલકને વીજ કરંટ લાગ્યો:અયોધ્યાનગરમાં વેપારીને ત્યાં હરિયાણાથી ટ્રક લઈ આવ્યો હતો, સિવિલ હોસ્પિટલમાં ખસેડાયો

ગોધરામાં બિસ્કિટનો જથ્થો ખાલી કરવા આવેલા હરિયાણાના એક ટ્રક ચાલકને વીજ કરંટ લાગ્યો હતો. આ ઘટનામાં તેઓ ગંભીર રીતે દાઝી ગયા હતા. તેમને તાત્કાલિક સારવાર અર્થે ગોધરા સિવિલ હોસ્પિટલ ખસેડવામાં આવ્યા છે. મૂળ હરિયાણાના વતની ગગન ધાનક બામરોલી અયોધ્યા નગર સોસાયટી વિસ્તારમાં એક વેપારીને ત્યાં બિસ્કિટનો જથ્થો ખાલી કરવા ટ્રક લઈને આવ્યા હતા. તેઓ ટ્રકની ઉપરના ભાગે આરામ કરી રહ્યા હતા અને નીચે ઉતરી રહ્યા હતા. તે સમયે અકસ્માતે તેમનો હાથ નજીકથી પસાર થઈ રહેલા હાઈ ટેન્શન વીજ વાયરને અડી ગયો હતો, જેના કારણે તેમને જોરદાર વીજ કરંટ લાગ્યો હતો. આ ઘટના બનતા જ આસપાસના લોકો અને વેપારી ઘટનાસ્થળે દોડી આવ્યા હતા. વીજ આંચકાના કારણે ચાલક ગગનભાઈ શરીરના ભાગે ગંભીર રીતે દાઝી ગયા હતા. હાલ તેમની ગોધરા સિવિલ હોસ્પિટલમાં સારવાર ચાલી રહી છે.