વેરાવળ ટાવર ચોકમાં બે આખલાઓ વચ્ચે યુદ્ધ:વ્યસ્ત વિસ્તારમાં મચી અફરાતફરી, સદનસીબે જાનહાનિ ટળી

વેરાવળના ટાવર ચોક ખાતે સોમવારે સાંજે બે આખલાઓ વચ્ચે લડાઈ થતાં અફરાતફરીનો માહોલ સર્જાયો હતો. શહેરના આ વ્યસ્ત વિસ્તારમાં આખલાઓ સામસામે આવી જતાં રાહદારીઓ અને વાહનચાલકોમાં ભય ફેલાયો હતો. સાંજના સમયે ટાવર ચોકમાં વાહનવ્યવહારનું ભારણ વધુ હોય છે. આખલાઓની લડાઈ શરૂ થતાં લોકોમાં નાસભાગ મચી હતી. વાહનચાલકોને આખલાઓથી અંતર રાખીને જોખમી રીતે રસ્તો પસાર કરવો પડ્યો હતો. આખલાઓની લડાઈને કારણે કોઈ વાહનચાલક કે રાહદારી અડફેટે આવે તેવી દહેશત હતી. ખાસ કરીને દ્વિચક્રી વાહનચાલકો માટે આ સ્થિતિ વધુ જોખમી હતી. સદનસીબે, આ ઘટનામાં કોઈ જાનહાનિ થઈ નહોતી. વેરાવળ શહેરમાં રખડતાં પશુઓનો પ્રશ્ન લાંબા સમયથી પ્રવર્તી રહ્યો છે. શહેરના મુખ્ય માર્ગો, બજારો અને જાહેર સ્થળોએ આવા પશુઓ અવારનવાર જોવા મળે છે. આના કારણે ટ્રાફિક વ્યવસ્થા અને નાગરિકોની સલામતી સામે જોખમ ઊભું થાય છે. આ ઘટનાએ પાલિકા તંત્રની રખડતાં પશુઓ અંગેની કામગીરી સામે ફરી સવાલો ઊભા કર્યા છે. નાગરિકોની માંગ છે કે પાલિકા દ્વારા માત્ર ઘટના બન્યા બાદ કાર્યવાહી કરવાને બદલે રખડતાં પશુઓને નિયંત્રિત કરવા માટે કાયમી અને અસરકારક વ્યવસ્થા ગોઠવવામાં આવે. શહેરના વ્યસ્ત વિસ્તારોમાંથી આખલાઓ સહિત રખડતાં પશુઓને દૂર કરીને નાગરિકો અને વાહનચાલકોની સલામતી સુનિશ્ચિત કરવામાં આવે તેવી વ્યાપક લોકમાંગ ઉઠી રહી છે.