વેરાવળ કોલેજમાં ‘નશામુક્ત યુવા ભારત’ સંકલ્પ સમારોહ યોજાયો:નશામુક્ત ભારતના સંકલ્પને સાકાર કરવા યુવાઓને જાગૃત કરાયા, નગરપાલિકા પ્રમુખ પણ હાજર રહ્યા

વેરાવળની સરકારી વિજ્ઞાન કોલેજમાં ‘નશામુક્ત યુવા ફોર વિકસિત ભારત’ પ્રકલ્પ હેઠળ એક સંકલ્પ સમારોહ યોજાયો હતો. આ કાર્યક્રમનો હેતુ નશામુક્ત ભારતના સંકલ્પને સાકાર કરવાનો અને યુવાઓમાં નશાકારક પદાર્થો અંગે જાગૃતિ લાવવાનો હતો. વેરાવળ-પાટણ નગરપાલિકાના પ્રમુખ નરેશભાઈ ગોહેલે યુવાઓને નશાથી દૂર રહેવા અને સમાજમાં નશામુક્તિ અંગે જાગૃતિ ફેલાવવા માટે પ્રેરણા આપી હતી. તેમણે નશામુક્ત ભારતના સંકલ્પને સફળ બનાવવા પર ભાર મૂક્યો હતો. ડો. સચિન એમ. સીતાપરાએ યુવાઓને પશ્ચિમીકરણ, આધુનિકીકરણ અને નશાના કારણે વ્યક્તિ તેમજ સમાજ પર થતી ખરાબ અસરો વિશે પોતાના વિચારો જણાવ્યા હતા. કોલેજના આચાર્ય ડો. સ્મિતા બી. છગે વિકસિત ભારતના નિર્માણમાં યુવા શક્તિના યોગદાન અંગે માર્ગદર્શન આપ્યું હતું. આ પ્રસંગે હાજર રહેલા તમામ વિદ્યાર્થીઓ, સ્ટાફ અને મહેમાનોએ નશામુક્તિની પ્રતિજ્ઞા લીધી હતી. તેમણે સિગ્નેચર વોલ પર સહી કરીને નશાકારક પદાર્થો સામે જાગૃતિ અને નશામુક્ત સમાજ બનાવવા માટે સંકલ્પ કર્યો હતો. આ કાર્યક્રમમાં સ્ટેન્ડિંગ કમિટીના ચેરમેન ઉદયભાઈ શાહ અને નગરપાલિકાની ટીમના સભ્યો હાજર રહ્યા હતા. આ ઉપરાંત, મહિલા કોલેજ અને ચોકસી કોલેજ, વેરાવળના આચાર્યો અને વિદ્યાર્થીઓ પણ ઉપસ્થિત હતા.