દલપુર પાસે હાઇવે પર કારનું ટાયર ફાટ્યું:ચાલકનો આબાદ બચાવ, ટ્રાફિક મોબાઈલે મદદ કરી

સાબરકાંઠા જિલ્લાના પ્રાંતિજ નજીક દલપુર પાસે નેશનલ હાઇવે પર એક કારનું ટાયર ફાટતાં અકસ્માત સર્જાયો હતો. સદનસીબે, કાર ચાલકનો આબાદ બચાવ થયો હતો. આ ઘટના મંગળવારે સાંજે હિંમતનગરથી અમદાવાદ તરફ જતા માર્ગ પર બની હતી. હિંમતનગરના અતુલભાઈ હસમુખભાઈ સોની તેમની હોન્ડા અમેઝ કાર લઈને ગાંધીનગરથી હિંમતનગર તરફ આવી રહ્યા હતા. દલપુર AGL ફેક્ટરી આગળ નેશનલ હાઇવે 48 પર તેમની કારનું આગળનું ટાયર અચાનક ફાટ્યું હતું. ટાયર ફાટવાને કારણે કાર અનિયંત્રિત થઈને અમદાવાદથી મેરઠ જઈ રહેલી ટ્રકના આગળના ભાગે અથડાઈ હતી. અકસ્માત બાદ કાર ચાલક અતુલભાઈ સોની કારમાં ફસાઈ ગયા હતા. તે દરમિયાન પ્રાંતિજથી હિંમતનગર તરફ જતી જિલ્લા ટ્રાફિક મોબાઈલની ટીમ ત્યાંથી પસાર થઈ હતી. ટ્રાફિક મોબાઈલની ટીમે તાત્કાલિક કાર્યવાહી કરીને કાર ચાલકને સુરક્ષિત રીતે બહાર કાઢ્યા હતા. આ અકસ્માતને કારણે નેશનલ હાઇવે પર થયેલો ટ્રાફિક જામ પણ દૂર કરવામાં આવ્યો હતો. આ ઘટનામાં કોઈ જાનહાનિ થઈ ન હતી.