ઓખાના દરિયાઈ સીમા-સંવદેનશીલ વિસ્તારોમાં સુરક્ષાનું નિરિક્ષણ કર્યુ:શિવરાજપુર બીચ સહિત દરિયાકાંઠે મરીન કમાન્ડોઝ દ્વારા સઘન પેટ્રોલિંગ

ગુજરાતના દરિયાકાંઠાની સુરક્ષા વ્યવસ્થાને વધુ સજ્જ અને સતર્ક રાખવાના આશયથી ઓખા મરીન વિસ્તારમાં મરીન ટાસ્ક ફોર્સ દ્વારા પેટ્રોલિંગ હાથ ધરાયું હતું. દરિયાઈ સીમા તેમજ દરિયાકાંઠાના સંવેદનશીલ વિસ્તારોમાં સુરક્ષાની સ્થિતિનું નિરીક્ષણ કરવામાં આવ્યું હતું. રાજ્યના વિશાળ દરિયાકિનારા અને તેની સાથે જોડાયેલા જમીન વિસ્તારની સલામતી માટે કાર્યરત મરીન ટાસ્ક ફોર્સ દ્વારા ઉચ્ચ પોલીસ અધિકારીઓના માર્ગદર્શન હેઠળ આ કામગીરી કરાઈ હતી. એટીએસના અધિક પોલીસ મહાનિર્દેશક અમિતકુમાર વિશ્વકર્મા, મરીન ટાસ્ક ફોર્સના નાયબ પોલીસ મહાનિરીક્ષક એ.એમ. મુનિયા તથા હજીરાના પોલીસ અધિક્ષક એસ.જે. પરમારના માર્ગદર્શન મુજબ શનિવારે ઓખા પંથકમાં પેટ્રોલિંગ યોજાયું હતું. ઓખાના ડીવાયએસપી કે.પી. પારેખ અને પી.એસ.આઈ. બી.એચ. ચાવડા સહિત મરીન કમાન્ડોઝની ટીમે શિવરાજપુર બીચ, રૂપેણ બંદર, ભડકેશ્વર, ગાયત્રી મંદિર, ઓખામઢી, ભોગાત, નાવદ્રા, લાંબા, સિકોતેર માતા, હર્ષદ-મિયાણી બ્રિજ તેમજ મહાદેવ મંદિર આસપાસના દરિયાકાંઠાના વિસ્તારોમાં ચાંપતી નજર રાખી પેટ્રોલિંગ કર્યું હતું.