પાંચમાં દિવસે બાપ્પાનું વિસર્જન:શહેરમાં 11 તળાવોમાં ગણેશ પ્રતિમાના વિસર્જનની વ્યવસ્થા, નવલખી મેદાન ખાતે પોલીસ કમિશનર અને મેયરે મુલાકાત લઈ નિરીક્ષણ કર્યું

વડોદરા શહેરમાં ગણેશોત્સવ દરમિયાન ગણેશ વિસર્જનના પવિત્ર પર્વને લઈ સ્થાનિક તંત્ર સંપૂર્ણપણે એક્શન મોડમાં આવી ગયું છે. પાંચમા દિવસે અનેક ભક્તો દ્વારા ગણપતિ બાપ્પાની પ્રતિમાઓનું ભાવભીની શ્રદ્ધા અને ઉમંગ સાથે વિસર્જન કરવામાં આવ્યું હતું. આ પ્રસંગે શહેરના વિવિધ વિસ્તારોમાં શ્રદ્ધાળુઓ માટે સુચારુ વ્યવસ્થા મળી રહે તે માટે વડોદરા મહાનગરપાલિકા અને પોલીસ તંત્ર દ્વારા સઘન આયોજન હાથ ધરવામાં આવ્યું છે. શાંતિપૂર્ણ અને સુવ્યવસ્થિત વાતાવરણમાં વિસર્જન પ્રક્રિયા સંપન્ન થાય તે હેતુથી વડોદરાના પોલીસ કમિશનર નરસિમ્હા કોમાર અને મેયર ગીતા મકવાણાએ રૂબરૂ સ્થળ પર પહોંચીને તમામ સુરક્ષા અને સુવિધાઓનું બારીકાઈથી નિરીક્ષણ કર્યું હતું. કૃત્રિમ તળાવ ખાતે પૂરતી વ્યવસ્થા ઉભી કરાઈ પર્યાવરણની સુરક્ષા અને ભક્તોની સુવિધાને ધ્યાનમાં રાખીને વડોદરા શહેરના અલગ-અલગ વિસ્તારોમાં કુલ 11 જેટલા કૃત્રિમ તળાવો તૈયાર કરવામાં આવ્યા છે. પાલિકા અને પોલીસ તંત્ર દ્વારા આ કૃત્રિમ તળાવો પર ભક્તોને કોઈ અગવડ ન પડે તે માટે તમામ પ્રાથમિક સુવિધાઓ ઉભી કરવામાં આવી છે. સ્થળ પર સુરક્ષા વ્યવસ્થાને વધુ મજબૂત બનાવવાની દિશામાં ફેન્સિંગ, બેરિકેડિંગ અને પૂરતી લાઈટિંગની વ્યવસ્થા સુનિશ્ચિત કરવામાં આવી છે, જેથી રાત્રિના સમયે પણ વિસર્જન કામગીરી સુરક્ષિત રીતે થઈ શકે. અણબનાવ ના બને તે માટે ચુસ્ત સુરક્ષા વ્યવસ્થા આ ઉપરાંત, કોઈ અણબનાવ ન બને તે માટે વડોદરા ફાયર બ્રિગેડની ટીમ, અનુભવી તરવૈયાઓ, મોટી ક્રેન અને ફાયર સેફ્ટીના જરૂરી તમામ સાધનો કૃત્રિમ તળાવો પર સતત તૈનાત રાખવામાં આવ્યા છે. શહેરમાં કાયદો અને વ્યવસ્થાની પરિસ્થિતિ જળવાઈ રહે તથા સમગ્ર વિસર્જન પ્રક્રિયા શાંતિપૂર્ણ માહોલમાં પૂર્ણ થાય તે માટે પોલીસ તંત્ર દ્વારા ચુસ્ત બંદોબસ્ત ગોઠવવામાં આવ્યો છે. મહાનગરપાલિકા અને પોલીસ વિભાગના અધિકારીઓ સતત સંકલનમાં રહીને તમામ વિસર્જન સ્થળો પર નજર રાખી રહ્યા છે. ભક્તોને સુરક્ષાનું પાલન કરવા અપીલ ભક્તોને પણ તંત્ર દ્વારા કરવામાં આવેલી વ્યવસ્થાઓનો લાભ લેવા અને સુરક્ષાના નિયમોનું પાલન કરીને બાપ્પાને વિદાય આપવા માટે ખાસ અપીલ કરવામાં આવી છે. પાલિકા અને પોલીસની આ સંયુક્ત કામગીરીને કારણે વડોદરામાં ૫મા દિવસનું ગણેશ વિસર્જન અત્યંત ઉત્સાહભેર અને સુરક્ષિત વાતાવરણમાં સંપન્ન થયું છે.