પાટણની PPG સ્કૂલમાં હિન્દી દિવસની ઉજવણી:વિદ્યાર્થીઓએ હિન્દી ભાષાનું મહત્ત્વ સમજાવ્યું, સાહિત્યિક અને સાંસ્કૃતિક પ્રસ્તુતિઓ આપી

પાટણની પી.પી.જી. એક્સપેરિમેન્ટલ હાઈસ્કૂલ ખાતે 'હિન્દી દિવસ'ની ઉજવણી કરાઈ હતી. આ પ્રસંગે શાળા પરિસરમાં હિન્દી સાહિત્ય અને સંસ્કૃતિનો માહોલ જોવા મળ્યો. કાર્યક્રમની શરૂઆત પ્રાર્થના અને દીપ પ્રાગટ્યથી થઈ હતી. શાળાના મદદનીશ શિક્ષક ડૉ. દાનેશ મોદીએ ૧૪ સપ્ટેમ્બર ૧૯૪૯ના દિવસને યાદ કર્યો. તેમણે વિદ્યાર્થીઓને ભારતીય બંધારણમાં હિન્દી ભાષાનું સ્થાન, તેની વૈશ્વિક સ્વીકૃતિ અને દેશને એકતાના સૂત્રમાં બાંધવામાં હિન્દીના યોગદાન વિશે સરળ ભાષામાં માહિતી આપી. વિદ્યાર્થિનીઓ કૃપાબા વાઘેલા અને હુનૈના શેખે હિન્દી ભાષાના મહત્ત્વ અને તેની મીઠાશ વિશે પોતાના વિચારો રજૂ કર્યા. તેમણે સમજાવ્યું કે હિન્દી ભાષા કેવી રીતે અલગ અલગ પ્રદેશના લોકોને જોડે છે. શાળાના આચાર્ય ડૉ. ઝુઝારસંગ સોઢાએ હિન્દી સાહિત્યના મહાન લેખકોનો પરિચય આપ્યો. તેમણે કબીર અને રહીમના દોહા, તેમજ સૂરદાસ અને તુલસીદાસની ભક્તિ રચનાઓ વિશે વાત કરી. વક્તાઓએ મુન્શી પ્રેમચંદની નવલકથાઓ અને મૈથિલીશરણ ગુપ્ત, રામધારી સિંહ 'દિનકર' તથા અજ્ઞેયજીની દેશભક્તિ અને આધુનિક રચનાઓ વિશે જણાવ્યું. આનાથી વિદ્યાર્થીઓમાં સાહિત્ય પ્રત્યે રુચિ જાગી. સાહિત્યિક ચર્ચાઓ સાથે સાંસ્કૃતિક કાર્યક્રમો પણ રજૂ થયા. વિદ્યાર્થીઓએ કવિ માખનલાલ ચતુર્વેદીની રચના "ચાહ નહીં મેં સુરબાલા કે ગહનો મેં ગૂંથા જાઊં..." ગાઈ. તેમણે "ધરતી કી શાન", "સત્યમ શિવમ સુન્દરમ" જેવા દેશભક્તિ ગીતો અને કબીર-રહીમની દોહાવલી પણ રજૂ કરી. ધોરણ-૯ ના વિદ્યાર્થીઓએ હાસ્ય-વ્યંગ નાટક "અંધેરી નગરી, ચોપટ રાજા" ભજવ્યું. વિદ્યાર્થીઓના અભિનય અને સંવાદે લોકોને હસાવ્યા અને સમાજને એક સંદેશ પણ આપ્યો. સમગ્ર કાર્યક્રમનું સંચાલન ડૉ. દાનેશ મોદીએ કર્યું હતું. કાર્યક્રમના અંતે શિક્ષક દીક્ષિતભાઈ પ્રજાપતિએ તમામ વિદ્યાર્થીઓ, શિક્ષકો અને માર્ગદર્શકોનો આભાર માન્યો.