રાણપુરમાં 'સમસ્ત હિન્દુ સમાજ'ના આમરણાંત ઉપવાસ શરૂ:શ્રાવણ માસમાં માંસ-મટન વેચાણ બંધ કરવાની માંગ

રાણપુરમાં સમસ્ત હિન્દુ સમાજ દ્વારા શ્રાવણ માસ દરમિયાન માંસ-મટનનું વેચાણ સંપૂર્ણપણે બંધ કરવાની માંગ સાથે આમરણાંત ઉપવાસ આંદોલન શરૂ કરવામાં આવ્યું છે. આગેવાનો રાણપુર મામલતદાર કચેરી સામે ઉપવાસી છાવણી નાખી ઉપવાસ પર બેઠા છે. સમસ્ત હિન્દુ સમાજ દ્વારા અગાઉ આ મામલે તંત્રને રજૂઆત કરવામાં આવી હતી. જોકે, કોઈ કાર્યવાહી ન થતાં હવે આમરણાંત ઉપવાસનો નિર્ણય લેવામાં આવ્યો છે. ઉપવાસી છાવણીમાં રામધૂન શરૂ કરીને આગેવાનો ઉપવાસ કરી રહ્યા છે. આગેવાનોએ સ્પષ્ટ જણાવ્યું છે કે, જ્યાં સુધી રાણપુર શહેરમાં શ્રાવણ માસ દરમિયાન માંસ-મટનનું વેચાણ બંધ નહીં થાય, ત્યાં સુધી આમરણાંત ઉપવાસ આંદોલન ચાલુ રાખવામાં આવશે.