રેટિંગ ગગડીને 33% પર પહોંચ્યું, 64% અમેરિકનો નાખુશ! શું ડોનાલ્ડ ટ્રમ્પના વળતા પાણી શરૂ થઈ ગયા?

Donald Trump Approval Rating: તમને તમારા શાળાના દિવસો યાદ છે? જ્યારે પણ કોઈ વિષયમાં માંડ 33% માર્ક્સ આવતા, ત્યારે આપણે ભગવાનનો પાડ માનતા કે "હાશ, પાસ તો થઈ ગયા." પરંતુ અમેરિકાના પ્રમુખ ડોનાલ્ડ ટ્રમ્પ માટે આ જ 33% નો આંકડો હાલમાં તેમની સૌથી મોટી મુશ્કેલી બની ગયો છે.

તાજેતરમાં જ આવેલા ડેટા મુજબ, ડોનાલ્ડ ટ્રમ્પની લોકપ્રિયતા (જેને અમેરિકામાં એપ્રુવલ રેટિંગ કહેવાય છે) ઘટીને માત્ર 33% રહી ગઈ છે. સીધા શબ્દોમાં કહીએ તો, દર 100 માંથી માત્ર 33 અમેરિકનો જ ટ્રમ્પના કામથી ખુશ છે, જ્યારે 64% લોકો ખુલ્લેઆમ તેમની કામગીરીથી નાખુશ જોવા મળ્યા છે.

સવાલ એ થાય છે કે અચાનક આવું કેમ થયું? અને નવેમ્બરમાં આવનારી ચૂંટણીઓ પર તેની કેવી અસર પડશે? ચાલો, આખો મામલો વિગતે સમજીએ.

પહેલા જોઈએ સર્વેના સચોટ આંકડા

રોઇટર્સ અને ઇપ્સોસ (Reuters/Ipsos) દ્વારા સંયુક્ત રીતે આ રેટિંગનો સર્વે કરવામાં આવ્યો હતો. તેમણે 14 થી 17 ઓગસ્ટ 2026 ની વચ્ચે 1,166 જેટલા યુવા અમેરિકનો સાથે વાતચીત કરી. જેનું પરિણામ કંઈક આવું આવ્યું:

માત્ર 33% લોકોએ કહ્યું કે તેઓ ટ્રમ્પની કામગીરીથી ખુશ (Approve) છે.

સામે 64% લોકોએ સ્પષ્ટ કહ્યું કે તેઓ ટ્રમ્પના કામથી સખત નાખુશ (Disapprove) છે.

આ સર્વેમાં એરર (ભૂલ) નો માર્જિન માત્ર 3% જ છે, એટલે કે આંકડા એકદમ સચોટ છે.

માત્ર એક જ સર્વે નહીં, અન્ય મોટા અને નામાંકિત પોલ્સ (Polls) પણ આ જ સાબિતી આપે છે:

'ધ ઇકોનોમિસ્ટ/યુગોવ' ના સર્વેમાં પણ ટ્રમ્પને 33% રેટિંગ જ મળ્યું છે.

'રીઅલક્લિયરપોલિટિક્સ' ની સરેરાશ મુજબ 39.2% લોકો ખુશ અને 58.6% નાખુશ છે.

'ન્યૂ યોર્ક ટાઇમ્સ' નો પોલ પણ 37% સંમતિ અને 59% અસંમતિ દર્શાવે છે.

ટ્રમ્પ સાથે આવું પહેલીવાર નથી બન્યું. ડિસેમ્બર 2017 માં તેમના પહેલા કાર્યકાળ વખતે પણ આ આંકડો 33% પર પહોંચ્યો હતો. એટલે કે, તેમના બંને કાર્યકાળ દરમિયાન આ સૌથી નીચો (લોએસ્ટ) રેકોર્ડ છે.

આખરે કેમ આટલું ગગડી ગયું ટ્રમ્પનું રેટિંગ?

નિષ્ણાતોના મતે, ટ્રમ્પની લોકપ્રિયતા ઘટવા પાછળ મુખ્યત્વે 2 મોટા કારણો જવાબદાર છે:

1. ઈરાન યુદ્ધ: વચનબંગ અને વધતો ખર્ચ

2024 ની ચૂંટણી વખતે ટ્રમ્પે અમેરિકનોને મોટું વચન આપ્યું હતું કે તેઓ દેશને હવે કોઈ નવા કે લાંબા યુદ્ધમાં ફસાવવા દેશે નહીં. પરંતુ, 2026 માં તેમણે ઈઝરાયલ સાથે હાથ મિલાવીને ઈરાન પર હુમલો કરી દીધો. શરૂઆતમાં એવા દાવા થયા હતા કે આ યુદ્ધ થોડાક જ અઠવાડિયામાં પૂરું થઈ જશે, પણ એવું થયું નહીં.

સામે ઈરાને હોર્મુઝ સ્ટ્રેટ (Hormuz Strait) પર કબ્જો જમાવીને વળતો પ્રહાર કર્યો, જેનાથી દુનિયાભરનો 20% ક્રૂડ ઓઈલનો વેપાર અટકી ગયો. સીધી અસર અમેરિકામાં પેટ્રોલ (ગેસોલિન) ના ભાવો પર પડી. સર્વે મુજબ:

80% અમેરિકનો (જેમાં 71% ટ્રમ્પના સમર્થક રિપબ્લિકન પણ સામેલ છે) માને છે કે આ યુદ્ધ બહુ લાંબુ ચાલશે.

માત્ર 20% લોકો આ યુદ્ધને સાચું માને છે, જ્યારે 80% લોકો તેને સદંતર ખોટું ગણાવી રહ્યા છે.

ટ્રમ્પે એક રેલીમાં એવું પણ કહી દીધું હતું કે, "ઈરાન પરમાણુ બોમ્બ ન બનાવે તે માટે જો આપણે પેટ્રોલના થોડા વધારે પૈસા ચૂકવવા પડે, તો તેમાં કંઈ ખોટું નથી." આ નિવેદનથી સામાન્ય જનતા ભડકી ગઈ, કારણ કે સીધી અસર તેમના ખિસ્સા પર પડી રહી છે.

2. મોંઘવારી: સામાન્ય માણસની કમર તૂટી

જ્યારે પેટ્રોલ મોંઘુ થાય, ત્યારે જીવનજરૂરી તમામ ચીજવસ્તુઓ (જેમ કે દૂધ, બ્રેડ, કપડાં, શાકભાજી) આપોઆપ મોંઘી થઈ જાય છે. 'ફાઇનાન્સિયલ ટાઇમ્સ' ના એક પોલમાં 53% લોકોએ સીધું જ કહ્યું કે ટ્રમ્પના રાજમાં તેમની આર્થિક સ્થિતિ ખૂબ જ ખરાબ થઈ ગઈ છે. મોંઘવારી કાબૂમાં લેવાના મુદ્દે ટ્રમ્પનું રેટિંગ માઈનસ (-42.4%) માં ચાલી રહ્યું છે, જે ખૂબ જ ગંભીર બાબત છે. 71% મતદારો ટ્રમ્પની મોંઘવારી નિયંત્રણ નીતિઓથી સખત નારાજ છે.

પોતાના જ પક્ષમાં પડવા લાગી છે તિરાડ

સૌથી ચોંકાવનારી વાત એ છે કે, માત્ર વિરોધીઓ જ નહીં, પણ પોતાના લોકો (રિપબ્લિકન) પણ હવે ટ્રમ્પથી મોં ફેરવી રહ્યા છે. ટ્રમ્પના કટ્ટર સમર્થકો (જેમને MAGA કહેવાય છે) ભલે 92% થી તેમની સાથે ઊભા હોય, પણ જે રિપબ્લિકન લોકો MAGA ગ્રુપના નથી, તેમની વચ્ચે ટ્રમ્પની લોકપ્રિયતા 90% થી ઘટીને સીધી 51% પર આવી ગઈ છે.

આ પણ વાંચોઃ શું ટ્રમ્પ ઈરાન પર પરમાણુ બોમ્બ ઝીંકશે? કોંગ્રેસવુમનના ચોંકાવનારા દાવાથી મચ્યો હોબાળો

2026 ની મધ્યસત્ર ચૂંટણીઓ પર શું અસર પડશે?

આગામી નવેમ્બર 2026 માં અમેરિકામાં કોંગ્રેસની તમામ 435 બેઠકો અને સેનેટની ત્રીજા ભાગની બેઠકો માટે મધ્યસત્ર ચૂંટણીઓ યોજાવાની છે. અમેરિકન રાજકારણનો ઈતિહાસ રહ્યો છે કે જ્યારે પ્રમુખનું રેટિંગ આટલું ખરાબ હોય, ત્યારે તેમના પક્ષને ચૂંટણીમાં બહુ મોટું નુકસાન સહન કરવું પડે છે.

લગભગ 10 વર્ષમાં પહેલીવાર એવું બન્યું છે કે અમેરિકન મતદારો દેશના અર્થતંત્રને સંભાળવા માટે ટ્રમ્પના પક્ષ (રિપબ્લિકન) કરતાં ડેમોક્રેટ્સ પર વધુ ભરોસો કરી રહ્યા છે. હવે રિપબ્લિકન ઉમેદવારો માટે પોતાના જ વિસ્તારમાં જઈને એમ કહેવું ભારે પડી રહ્યું છે કે "અમે ટ્રમ્પની સાથે છીએ, અમને મત આપો."

શું આ રેટિંગ હજુ વધારે નીચે જઈ શકે?

વિદેશી બાબતોના નિષ્ણાતો માને છે કે આવનારા સમયમાં આ આંકડો હજુ પણ ગગડી શકે છે. કારણ કે એક તરફ 17 ઓગસ્ટે યુદ્ધને લગતો વાટાઘાટોનો 60 દિવસનો સમય પૂરો થઈ ગયો છે અને શાંતિની કોઈ આશા દેખાતી નથી. બીજી તરફ, 58% મતદારોનું માનવું છે કે ઈરાન સંકટને લીધે વધેલી મોંઘવારી હજુ લાંબો સમય આમ જ રહેશે. જેમ જેમ નવેમ્બર નજીક આવશે, તેમ તેમ લોકોનો આ ગુસ્સો વોટિંગ મશીન પર ચોક્કસપણે દેખાશે. 2017 માં ભલે ટ્રમ્પે 33% રેટિંગ હોવા છતાં 2024 ની ચૂંટણી જીતી લીધી હોય, પરંતુ આ વખતે મોંઘવારી અને યુદ્ધના બેવડા માર વચ્ચે રસ્તો જરાય આસાન નથી.

આ પણ વાંચોઃ Trump vs Iran: શું ઈરાન સામે ટ્રમ્પ હાંફી ગયા? એક શરતે પરમાણુ ડીલ છોડવા તૈયાર, રિપોર્ટમાં મોટો દાવો