શહેર કોંગ્રેસનો ચક્કાજામ કરી વિરોધ પ્રદર્શન:હલદવાણી ઘટના અને રાહુલ ગાંધી સામે નોંધાયેલી FIRના વિરોધમાં ભાવનગર કોંગ્રેસના ચક્કાજામ સાથે વિરોધ પ્રદર્શન, પોલીસ કાર્યકરોની અટકાયત કરી

ઉત્તરાખંડના હલ્દ્વાનીમાં કોંગ્રેસ પ્રમુખ મલ્લિકાર્જુન ખડગે સાથે કથિત અસ્પૃશ્યતા વિવાદ અને ત્યારબાદ રાહુલ ગાંધી સામે નોંધાયેલી FIRના પ્રત્યાઘાત રૂપે આજે ભાવનગર શહેર કોંગ્રેસ દ્વારા રસ્તો રોકીને આક્રમક ચક્કાજામ અને ઉગ્ર વિરોધ પ્રદર્શન કર્યું હતું. જેને લઈ પોલીસે આગેવાનો અને કાર્યકરોની અટકાયત કરી હતી. શહેર કોંગ્રેસે ઉગ્ર વિરોધ કર્યો હલ્દ્વાનીમાં ખાતે કોંગ્રેસના રાષ્ટ્રીય પ્રમુખ મલ્લિકાર્જુન ખડગે સાથે થયેલા કથિત અસ્પૃશ્યતા અને ‘શુદ્ધિકરણ’ વિવાદ બાદ રાજકારણ ગરમાયું છે. આ ઘટના બાદ દોષિતો સામે FIR કરવાની માગ સાથે પ્રેસ કોન્ફરન્સ કરનાર રાહુલ ગાંધી સામે જ પોલીસ કેસ નોંધાતા કોંગ્રેસ કાર્યકરોમાં ભારે રોષ છે. જેના વિરોધમાં ભાવનગર શહેર કોંગ્રેસ દ્વારા રસ્તો રોકી ઉગ્ર વિરોધ પ્રદર્શન કરવામાં આવ્યું હતું. ભાજપ અને RSS પર શહેર કોંગ્રેસ પ્રમુખના પ્રહાર શહેર કોંગ્રેસ પ્રમુખ લાલભા ગોહિલએ આક્ષેપ કર્યો હતો કે, ભાજપ અને RSSના કાર્યકરો દ્વારા શુદ્ધિકરણના નામે ઘૃણાસ્પદ નીતિ અપનાવવામાં આવી છે. આ મામલે અવાજ ઉઠાવનાર રાહુલ ગાંધી પર જ સરકારના ઈશારે ખોટી FIR દાખલ કરવામાં આવી છે. જે સરકારની વિરોધ સહન ન કરવાની નીતિ દર્શાવે છે. દેશમાં જાતિવાદની રાજનીતિને કોંગ્રેસ પક્ષ ક્યારેય સાંખી લેશે નહીં. ભાવનગરમાં યોજાયેલા આ કાર્યક્રમમાં કાર્યકરોએ સૂત્રોચ્ચાર કરી રસ્તો રોક્યો હતો અને દોષિતો સામે તાત્કાલિક પગલાં ભરવાની તેમજ રાહુલ ગાંધી પરનો કેસ પાછો ખેંચવાની માગ કરી હતી.