સખી સેન્ટરે 22 વર્ષીય યુવતીને પરિવાર સાથે મિલાવી:બાયડ પોલીસ સ્ટેશન મારફતે આવી હતી, 9 દિવસ આશ્રય અને કાઉન્સેલિંગ અપાયું

અરવલ્લી જિલ્લાના સખી વન સ્ટોપ સેન્ટરે 22 વર્ષીય યુવતીને 9 દિવસ આશ્રય અને કાઉન્સેલિંગ આપ્યા બાદ પરિવાર સાથે મિલાવી હતી. યુવતીને બાયડ પોલીસ સ્ટેશન મારફતે સેન્ટર પર લાવવામાં આવી હતી.જિલ્લા કલેક્ટરના અધ્યક્ષસ્થાને અને જિલ્લા મહિલા તથા બાળ અધિકારીના માર્ગદર્શન હેઠળ સેન્ટર મુશ્કેલીમાં મુકાયેલી મહિલાઓ અને યુવતીઓને આશ્રય, કાઉન્સેલિંગ, મેડિકલ સહાય અને બીજી જરૂરી સેવાઓ આપે છે. સેન્ટરમાં યુવતી સાથે વાતચીત અને કાઉન્સેલિંગ દરમિયાન જાણવા મળ્યું કે એક યુવક પ્રત્યેની લાગણીને કારણે તે ભાવનાત્મક રીતે વ્યથિત હતી. આ મુદ્દે પરિવાર સાથે મતભેદ થતાં તેણે ઘર છોડ્યું હતું.સેન્ટરે યુવતીને 9 દિવસ સુરક્ષિત આશ્રય આપ્યો. આ દરમિયાન તેને મેડિકલ સહાય, જીવનજરૂરિયાતની કીટ અને કાઉન્સેલિંગની સુવિધા મળી. ટીમે તેની સાથે સતત વાતચીત કરી અને તેની લાગણીઓ તથા પરિસ્થિતિ સમજવાનો પ્રયાસ કર્યો. કાઉન્સેલિંગમાં યુવતીને અભ્યાસ, કારકિર્દી, આત્મનિર્ભરતા અને ભવિષ્ય વિશે વિચારીને નિર્ણયો લેવા સમજાવવામાં આવ્યું. તેને શિક્ષણ અને કૌશલ્ય વિકાસ દ્વારા આત્મનિર્ભર બનવા પ્રોત્સાહિત કરાઈ.યુવતીના માતા-પિતાનું પણ કાઉન્સેલિંગ કરાયું. તેમને દીકરીની લાગણીઓ સમજવા અને તેના અભ્યાસ તથા કારકિર્દી માટે તક અને સહકાર આપવા માર્ગદર્શન અપાયું. પરિવાર અને યુવતી વચ્ચે સમજણ તથા વિશ્વાસ વધે તે માટે ટીમે મદદ કરી. કાઉન્સેલિંગ દરમિયાન જાણવા મળ્યું કે યુવતીનો હાલ યુવક સાથે સંપર્ક નથી. ટીમે તેને ભૂતકાળની પરિસ્થિતિમાંથી બહાર આવી ભવિષ્યના લક્ષ્યો પર ધ્યાન આપવા પ્રોત્સાહિત કરી. સતત કાઉન્સેલિંગ અને સહાય બાદ યુવતી તથા તેના માતા-પિતા વચ્ચે સમજણ ઊભી થઈ. ત્યારબાદ સેન્ટરની ટીમે યુવતીને સલામત રીતે પરિવાર સાથે મિલાવી.