Uttar Pradesh : મથુરામાં ડ્રગ્સ તસ્કરીનો પર્દાફાશ, રૂપિયા 1.25 કરોડના 250 કિલો ગાંજા સાથે 5 આરોપી ઝડપાયા

ઉત્તર પ્રદેશના મથુરામાં નશીલા પદાર્થોની તસ્કરી વિરુદ્ધ પોલીસે મોટી કાર્યવાહી કરી છે. NTF અને ફરહ પોલીસની સંયુક્ત ટીમે આગ્રા-મથુરા નેશનલ હાઈવે પર રૈપુરા જાટ વિસ્તાર નજીક ચેકિંગ દરમિયાન આશરે 300 કિલો ગેરકાયદે ગાંજો જપ્ત કર્યો છે. પોલીસે જપ્ત કરાયેલા ગાંજાની બજાર કિંમત આશરે ₹1.25 કરોડ હોવાનું જણાવ્યું છે. આ કાર્યવાહી દરમિયાન તસ્કરીમાં ઉપયોગમાં લેવાતો એક ટ્રક અને એક કાર પણ જપ્ત કરવામાં આવ્યા છે. પોલીસે પાંચ આરોપીઓની ધરપકડ કરી છે. ઘેરાબંધી કરીને વાહનોનું સઘન ચેકિંગ શરૂ કર્યું પોલીસને માહિતી મળી હતી કે નશીલા પદાર્થોની મોટી ખેપ આગ્રા-મથુરા હાઈવે મારફતે લઈ જવામાં આવી રહી છે. માહિતીના આધારે ટીમે રૈપુરા જાટ નજીક ઘેરાબંધી કરીને વાહનોનું સઘન ચેકિંગ શરૂ કર્યું હતું. આ દરમિયાન એક શંકાસ્પદ ટ્રક અને કાર નજરે પડતાં બંનેને રોકી તલાશી લેવામાં આવી હતી. તપાસ દરમિયાન ટ્રકમાંથી મોટી માત્રામાં ગાંજો મળી આવ્યો હતો. કારમાં સવાર લોકો ટ્રકને એસ્કોર્ટ કરતા હતા પ્રાથમિક તપાસમાં સામે આવ્યું છે કે તસ્કરોએ ગાંજાની ખેપ એક સ્થળેથી બીજા સ્થળે પહોંચાડવા માટે ટ્રકનો ઉપયોગ કર્યો હતો. જ્યારે કારમાં સવાર લોકો ટ્રકને એસ્કોર્ટ કરતા હતા અને રસ્તામાં પોલીસની હિલચાલ પર નજર રાખતા હોવાની માહિતી સામે આવી છે. પોલીસે ઘટનાસ્થળેથી પાંચ આરોપીઓને ઝડપી લીધા છે. હવે તેમની પૂછપરછ કરીને ગાંજાનો જથ્થો ક્યાંથી લાવવામાં આવ્યો હતો અને તેને મથુરા અથવા આસપાસના વિસ્તારમાં ક્યાં સપ્લાય કરવાનો હતો તેની માહિતી મેળવવામાં આવી રહી છે. અધિકારીઓના જણાવ્યા મુજબ, આટલી મોટી માત્રામાં ગાંજાની જપ્તી પાછળ સંગઠિત તસ્કરી નેટવર્ક હોવાની શક્યતા છે. પોલીસ હવે ગેંગના મુખ્ય સૂત્રધાર અને અન્ય સાગરીતો સુધી પહોંચવા તપાસ કરી રહી છે. ધરપકડ કરાયેલા આરોપીઓ સામે કાયદેસરની કાર્યવાહી ચાલુ છે. આ પણ વાંચો : Punjabમાં હથિયારોની તસ્કરી કરતા ગેંગનો પર્દાફાશ, 10 પિસ્તોલ સાથે 2 આરોપી ઝડપાયા