વિજયનગરમાં કારમાંથી રૂ. 1.22 લાખનો દારૂ ઝડપાયો:બે આરોપી પકડાયા, એક ફરાર, ત્રણ સામે ગુનો નોંધાયો

સાબરકાંઠા જિલ્લાના વિજયનગર પોલીસે કાલવણ ચેકપોસ્ટ પાસેથી વિદેશી દારૂ ભરેલી કાર ઝડપી પાડી છે. પોલીસે ₹1.22 લાખની કિંમતના દારૂ સાથે અમદાવાદના બે આરોપીઓની ધડપકડ કરી છે. આ કાર્યવાહીમાં કાર અને મોબાઈલ સહિત કુલ ₹5.52 લાખનો મુદ્દામાલ જપ્ત કરવામાં આવ્યો છે. વિજયનગર પોલીસ સ્ટેશનના ઇન્ચાર્જ PI બી.ડી. રાઠોડે આ સફળ કામગીરી અંગે માહિતી આપી હતી. મંગળવારે રાત્રે કાલવણ ચેકપોસ્ટ પરથી પસાર થતી શંકાસ્પદ કારને રોકીને તપાસ કરાઈ હતી. પોલીસે કારમાં સવાર રાણીપ વિસ્તારના સચિન ઠાકોર અને સાવન ઠાકોરને સ્થળ પર જ ઝડપી લીધા હતા. આ મામલે રાજસ્થાનના દારૂના સેલ્સમેન સહિત ત્રણ વ્યક્તિઓ સામે ગુનો નોંધવામાં આવ્યો છે. કાલવણ ચેકપોસ્ટ પરથી કારમાંથી દારૂ મળ્યો પોલીસે શંકાસ્પદ કારને રોકીને તલાશી લેતા તેમાંથી વિદેશી દારૂનો જથ્થો મળી આવ્યો હતો. કારમાંથી 31 પેટીમાં રાખેલી ₹1.22 લાખની કિંમતની કુલ 984 બોટલ વિદેશી દારૂ જપ્ત કરાયો હતો. આ સિવાય પોલીસે ₹30 હજારની કિંમતના બે મોબાઈલ ફોન અને કાર કબજે કરી હતી. પોલીસે કુલ ₹5.52 લાખનો મુદ્દામાલ જપ્ત કરીને કાયદેસરની કાર્યવાહી હાથ ધરી છે. અમદાવાદના બે આરોપી ઝડપાયા અને સેલ્સમેન ફરાર પોલીસે અમદાવાદના બકરામંડી, રાણીપના સચિન ઠાકોર અને રાણીપના સાવન ઠાકોરની અટકાયત કરી છે. આ ઉપરાંત દારૂનો જથ્થો આપનાર રાજસ્થાનના દૈયા ઠેકાના સેલ્સમેન લલિત ચૌધરી સામે પણ ફરિયાદ નોંધાઈ છે. સેલ્સમેન લલિત ચૌધરી હાલ પોલીસ પકડથી દૂર હોવાથી તેને ફરાર જાહેર કરાયો છે. વિજયનગર પોલીસ સ્ટેશનમાં ગુનો નોંધીને ફરાર આરોપીને ઝડપી પાડવા વધુ તપાસ શરૂ કરાઈ છે.