સાબરકાંઠા-અરવલ્લીની 122 દીકરીઓને રક્ષાબંધન પર સાડી ભેટ:સાંસદ શોભનાબેન બારૈયાએ સમૂહલગ્નોત્સવમાં લગ્નગ્રંથિથી જોડાયેલી દીકરીઓને સાડી ભેટ આપી

હિંમતનગરમાં રક્ષાબંધન પર્વ નિમિત્તે સાબરકાંઠા અને અરવલ્લી જિલ્લાની 122 દીકરીઓને સાડી ભેટ આપવામાં આવી હતી. આ કાર્યક્રમ હિંમતનગરના નવા સર્કિટ હાઉસ ખાતે સાંસદ શોભનાબેન બારૈયા દ્વારા યોજવામાં આવ્યો હતો. આ દીકરીઓ ગત વર્ષે સાંસદ દ્વારા આયોજિત સમૂહલગ્નોત્સવમાં લગ્નગ્રંથિથી જોડાયેલી હતી. સાંસદ શોભનાબેન બારૈયાએ દીકરી ન હોવાથી આ તમામ દીકરીઓને પોતાની દીકરીઓ ગણીને રક્ષાબંધનની ઉજવણી કરવાનો સંકલ્પ કર્યો હતો. કાર્યક્રમ દરમિયાન સાંસદે દીકરીઓ સાથે આત્મીયતા વ્યક્ત કરી હતી અને તેમને સાડી ભેટ આપી હતી. આ ઉપરાંત, જે દીકરીઓ પાસે પોતાનું ઘર નથી, તેમને પંડિત દીનદયાળ આવાસ યોજના સહિતની સરકારી યોજનાઓનો લાભ અપાવી ઘર મળે તે માટે પ્રયાસ કરવાની પણ ખાતરી આપી હતી. સાંસદ શોભનાબેન બારૈયાએ જાહેરાત કરી હતી કે આગામી વર્ષ 2027માં ફરીથી સાંસદ સમૂહલગ્નનું આયોજન કરવામાં આવશે.