નરેડીમાં ક્રાઇમ બ્રાન્ચે દરોડો પાડી જુગારધામ ઝડપ્યું:જૂનાગઢના નરેડી ગામની વાડીમાં ચાલતા જુગારધામ પર ક્રાઇમ બ્રાન્ચનો દરોડો, 8 જુગારીઓ રૂ. 2.48 લાખના મુદ્દામાલ સાથે પકડાયા

​શ્રાવણ મહિનાની શરૂઆત થતાં જ પત્તા પ્રેમીઓની જાણે કે મોસમ આવી હોય તેમ છેલ્લા ઘણા સમયથી જૂનાગઢ પોલીસ દ્વારા વાડી વિસ્તાર અને સીમ વિસ્તારમાંથી જુગારના અનેક કેસો પકડી પાડવામાં આવ્યા છે. આ ઝુંબેશ અંતર્ગત જૂનાગઢ ક્રાઇમ બ્રાન્ચે નરેડી ગામમાંથી જુગાર રમતા 8 જુગારીઓને રંગેહાથ ઝડપી પાડ્યા છે. ​ક્રાઇમ બ્રાન્ચના સ્ટાફને મળેલી ચોક્કસ ખાનગી બાતમીના આધારે વંથલી તાલુકાના નરેડી ગામથી બોડકા ગામ તરફ જતા રસ્તે પશ્ચિમ બાજુએ આવેલ 'ધાર' નામના વાડી વિસ્તારમાં દરોડો પાડવામાં આવ્યો હતો. આ વાડી હસમૂખભાઈ પરબતભાઈ સાબલપરાની કબજા-ભોગવટાની છે. તેઓ પોતાની વાડીમાં આવેલા પતરાવાળા મકાનમાં બહારથી માણસોને બોલાવી, જુગારના સાધનો પૂરા પાડીને તીન-પત્તી રોન-પોલીસ નામનો હાર-જીતનો જુગાર રમાડતા હતા અને અંગત આર્થિક ફાયદા માટે નાલ ઉઘરાવીને જુગારનો અખાડો ચલાવતા હોવાનું સામે આવ્યું હતું. ​પોલીસે બાતમીની ખરાઈ કરીને ઘટનાસ્થળે અચાનક દરોડો પાડતાં જુગાર રમતા કુલ 8 ઇસમો રંગેહાથ પકડાઈ ગયા હતા. આ પકડાયેલા આરોપીઓમાં નરેડી ગામના હસમૂખભાઈ પરબતભાઈ સાબલપરા, પંકજભાઈ કેશુભાઈ ડોબરીયા, હિતેશભાઈ વિઠ્ઠલભાઈ બરવાડીયા અને કિરીટભાઈ જીવાભાઈ વદરનો સમાવેશ થાય છે. આ ઉપરાંત રવની ગામના પ્રફુલભાઈ મોહનભાઈ ભાલારા, વીરપુર ગામના યાકુબભાઈ તારમહંમદભાઈ સીડા તથા રફીકભાઈ મહંમદભાઈ સીડા અને આંબાલીયા ગામના ઈશાભાઈ અલારખાં સાંઈ પણ જુગાર રમતા ઝડપાયા હતા. આ તમામ સામે વંથલી પોલીસ સ્ટેશનમાં જુગાર ધારાની કલમ 4 અને 5 મુજબ ગુન્હો રજીસ્ટર કરીને કાયદેસરની કાર્યવાહી હાથ ધરવામાં આવી છે. ​રેઇડ દરમિયાન પોલીસે સ્થળ પરથી મોટા પ્રમાણમાં મુદ્દામાલ કબ્જે કર્યો છે. જેમાં જુગારીઓ પાસેથી મળેલા રોકડા રૂપિયા 97,400 અને નાલની રકમ રૂપિયા 5,500 મળીને કુલ રોકડ રકમ કબ્જે કરાઈ છે. આ ઉપરાંત રૂ. 26,000ની કિંમતના 6 નંગ મોબાઇલ ફોન, રૂ. 1,20,000ની કિંમતની 4 મોટર સાયકલ તથા જુગારનું સાહિત્ય અને ગંજીપતાના પાના મળીને કુલ રૂપિયા 2,48,900નો મુદ્દામાલ જપ્ત કરવામાં આવ્યો છે.