અમરેલીમાં 80મા સ્વાતંત્ર્ય દિવસની રાજ્યકક્ષાની ઉજવણી:કલેક્ટર વિકલ્પ ભારદ્વાજે નાગરિકોને ભાગ લેવા આમંત્રણ આપ્યું

અમરેલી જિલ્લામાં 15 ઓગસ્ટ, 2026ના રોજ 80મા સ્વાતંત્ર્ય દિવસની રાજ્યકક્ષાની ભવ્ય ઉજવણી થશે. આ પ્રસંગે ગુજરાતના મુખ્યમંત્રી ભૂપેન્દ્ર પટેલ અમરેલી ખાતે ધ્વજવંદન કરશે. જિલ્લા કલેક્ટર વિકલ્પ ભારદ્વાજે આ ઐતિહાસિક કાર્યક્રમમાં ભાગ લેવા માટે સમગ્ર જિલ્લાના નાગરિકોને જાહેર નિમંત્રણ પાઠવ્યું છે. સ્વાતંત્ર્ય દિવસનો મુખ્ય સમારોહ 15 ઓગસ્ટે સવારે 9 વાગ્યે પોલીસ પરેડ મેદાન ખાતે યોજાશે. મુખ્યમંત્રી તિરંગો ફરકાવ્યા બાદ રાષ્ટ્રધ્વજને સલામી આપવામાં આવશે. આ કાર્યક્રમમાં સાંસ્કૃતિક પ્રસ્તુતિઓ અને પોલીસ વિભાગ દ્વારા વિવિધ પ્રદર્શનો પણ સામેલ હશે. જાહેર જનતાને સવારે 8 વાગ્યા સુધીમાં ગ્રાઉન્ડ ખાતે પોતાનું સ્થાન ગ્રહણ કરવા વિનંતી કરવામાં આવી છે. સ્વાતંત્ર્ય દિવસની પૂર્વ સંધ્યાએ, 14 ઓગસ્ટના રોજ પણ અમરેલીમાં વિવિધ કાર્યક્રમોનું આયોજન કરવામાં આવ્યું છે. જેમાં સાંજે 4:30 થી 5:30 કલાક દરમિયાન નવી નૂતન સ્કૂલ ખાતે રાજ્યપાલ આચાર્ય દેવવ્રતજીની ઉપસ્થિતિમાં 'એટહોમ' કાર્યક્રમ યોજાશે. આ કાર્યક્રમમાં રાજ્યપાલ જિલ્લાના વિશિષ્ટ નાગરિકો અને અગ્રણીઓને શુભેચ્છાઓ પાઠવશે, જેમાં મુખ્યમંત્રી પણ વિશેષરૂપે સહભાગી થશે. ત્યારબાદ, સાંજે 6:30 થી 8:30 દરમિયાન કમાણી ફોરવર્ડ સ્કૂલના મેદાન ખાતે ભવ્ય સાંસ્કૃતિક કાર્યક્રમ યોજાશે. આ કાર્યક્રમમાં રાજ્યપાલ, મુખ્યમંત્રી, મંત્રીમંડળના સભ્યો અને અન્ય મહાનુભાવો ઉપસ્થિત રહેશે. આ અવસરે જિલ્લા સ્તરે સમાજ સેવા, કલા અને સાહિત્ય સહિતના ક્ષેત્રે વિશિષ્ટ યોગદાન આપનાર વ્યક્તિઓને મહાનુભાવોના હસ્તે સન્માનિત કરવામાં આવશે. સાથોસાથ, મુખ્યમંત્રીના હસ્તે જિલ્લાના આશરે રૂ. 403 કરોડના વિવિધ વિકાસ કાર્યોનું ઈ-લોકાર્પણ તથા ઈ-ખાતમુહૂર્ત પણ કરવામાં આવશે. ધ્વજવંદન સમારોહ બાદ અમરેલી જિલ્લાના ઇતિહાસ અને સંસ્કૃતિ પર આધારિત એક વિશિષ્ટ સાંસ્કૃતિક કાર્યક્રમ પણ રજૂ કરવામાં આવશે. કલેક્ટર વિકલ્પ ભારદ્વાજે તમામ નાગરિકોને આ કાર્યક્રમોમાં ઉપસ્થિત રહીને ઉજવણીને સફળ બનાવવા માટે ફરીથી અપીલ કરી છે.