Ahmedabad News: ધંધુકા-લીંબડી રોડ પર વાસણા પાસે બે બાઇક વચ્ચે અકસ્માત, 3 ગંભીર રીતે ઇજાગ્રસ્ત

અમદાવાદ જિલ્લામાં ધંધુકા-લીંબડી સ્ટેટ હાઇવે પર આવેલા વાસણા ગામના પાટિયા નજીક એક ગમખ્વાર માર્ગ અકસ્માતની ઘટના સામે આવી છે. વાસણા ગામ પાસે પુરપાટ ઝડપે આવી રહેલી બે મોટરસાયકલ સામસામે ધડાકાભેર અથડાતાં અકસ્માત સર્જાયો હતો. ટક્કર એટલી જોરદાર હતી કે, બંને બાઇક સવારો રોડ પર પટકાયા હતા અને અકસ્માતનો ભારે અવાજ આવતાં જ આસપાસના સ્થાનિક લોકો અને વાહનચાલકો ઘટના સ્થળે દોડી આવ્યા હતા. અકસ્માતમાં 3 લોકો ગંભીર રીતે ઈજાગ્રસ્ત આ ગમખ્વાર માર્ગ અકસ્માતમાં બંને બાઇક પર સવાર કુલ 3 વ્યક્તિઓને શરીરે ગંભીર ઇજાઓ પહોંચી હતી. ઈજાગ્રસ્તો રોડ પર રક્તરંજિત હાલતમાં તરફડતા હોવાથી સ્થાનિક લોકોએ તાત્કાલિક ધોરણે મદદ માટે હાથ લંબાવ્યો હતો અને પરિસ્થિતિની ગંભીરતા જોઈને તુરંત જ ઈમરજન્સી રિસ્પોન્સ સર્વિસ 108 એમ્બ્યુલન્સને કોલ કરીને ઘટના અંગે જાણ કરી હતી. 108 મારફતે ધંધુકા RMS હોસ્પિટલમાં ખસેડાયા ઘટનાની જાણ થતાં જ ધંધુકા 108 એમ્બ્યુલન્સની ટીમ વિલંબ કર્યા વગર તાત્કાલિક સ્થળ પર પહોંચી ગઈ હતી. 108ના ઇમરજન્સી મેડિકલ ટેકનિશિયનોએ ઇજાગ્રસ્તોને સ્થળ પર જ પ્રાથમિક સારવાર આપીને વધુ ગહન સારવાર અર્થે ધંધુકાની RMS હોસ્પિટલ ખાતે ખસેડ્યા છે. હાલમાં તમામ ઇજાગ્રસ્તો RMS હોસ્પિટલમાં સારવાર હેઠળ છે અને બનાવ અંગે સ્થાનિક પોલીસને પણ જાણ કરવામાં આવી છે. પોલીસ આ મામલે ઘટના સ્થળે અને હોસ્પિટલ ખાતે પહોંચીને તપાસ કરી રહી છે. આ પણ વાંચો: Ahmedabad News: ચાંદખેડામાં સાવકા પિતાએ સગીરા પર આચર્યું દૂષ્કર્મ, વીડિયો પુરાવાના આધારે ધરપકડ