અમદાવાદમાં નરોડા-નારોલ રોડ પર ગમખ્વાર અકસ્માત:ખોડિયારનગર ચાર રસ્તા પાસે ટ્રકે ટૂ-વ્હીલરને કચડતાં 17 વર્ષીય સગીરનું કમકમાટીભર્યું મોત

અમદાવાદ શહેરના નરોડા-નારોલ હાઇ-વે પર આવેલા ખોડિયારનગર ચાર રસ્તા પાસે બુધવારે મોડી રાત્રિના સુમારે એક કાળજું કંપાવી દેનારો ગમખ્વાર અકસ્માત સર્જાયો હતો. બંધ પડી ગયેલી ઇલેક્ટ્રિક બાઇક માટે મિત્રની મદદે ગયેલા બે યુવાનોના ટૂ-વ્હીલરને પૂરપાટ ઝડપે આવી રહેલી એક બેફામ ટ્રકે જોરદાર ટક્કર મારી હતી. આ અકસ્માતમાં ટૂ-વ્હીલરની પાછળ બેઠેલો 17 વર્ષીય નિર્દોષ સગીર રસ્તા પર પટકાયો હતો અને ટ્રકનું તોતિંગ ટાયર તેના શરીર પર ફરી વળતાં તેનું ઘટનાસ્થળે જ અત્યંત કમકમાટીભર્યું મોત નીપજ્યું હતું. આ અરેરાટીભરી ઘટના સંદર્ભે ટૂ-વ્હીલર ચાલક મિત્રની ફરિયાદના આધારે ટ્રાફિક પોલીસે ગુનો દાખલ કરીને ફરાર થવાનો પ્રયાસ કરી રહેલા ટ્રક ચાલકની ધરપકડ કરી લીધી છે. રાત્રે ઇ-બાઇક બંધ પડતાં મિત્રો મદદ માટે પહોંચ્યા હતા બનાવની પ્રાપ્ત વિગતો અનુસાર, મૂળ બનાસકાંઠાના વાવ-થરાદ પંથકના વતની અને હાલ દસ્ક્રોઈ તાલુકાના બાકરોલ ખાતે ક્રિષ્ના હાર્ડવેરમાં નોકરી કરતા 19 વર્ષીય કિરણભાઈ નટવરજી ઠાકોર રાત્રિના સમયે પોતાના મિત્રનું ઇલેક્ટ્રિક ટૂ-વ્હીલર લઈને ઘરે જવા નીકળ્યા હતા. રાત્રિના 11 વાગ્યાની આસપાસ સિંગરવા નજીક પહોંચતાં જ આ ઇલેક્ટ્રિક વાહન અચાનક ટેકનિકલ ખામી સર્જાવાને કારણે બંધ પડી ગયું હતું. રાતના સમયે રસ્તા વચ્ચે અટવાઈ ગયેલા કિરણભાઈએ તાત્કાલિક પોતાના મિત્રોને ફોન કરીને સમગ્ર હકીકત જણાવી મદદ માટે બોલાવ્યા હતા. જેથી મિત્રો બીજું ટૂ-વ્હીલર લઈને સિંગરવા ખાતે તેમની મદદે પહોંચ્યા હતા. ખોડિયારનગર ચાર રસ્તા પાસે બેફામ ટ્રકે અડફેટે લીધા બંધ પડેલું ઇલેક્ટ્રિક વાહન ચાલુ ન થઈ શકતાં કિરણભાઈ પોતાના 17 વર્ષીય મિત્ર કરસન વાઘેલાને સાથે બેસાડીને બીજા ઇલેક્ટ્રિક ટૂ-વ્હીલર પર સવાર થઈ ખોડિયારનગર તરફ આગળ વધી રહ્યા હતા. તેઓ જેવો ખોડિયારનગર ચાર રસ્તા પાસેથી પસાર થઈ રહ્યા હતા ત્યારે નરોડા તરફથી અત્યંત પૂરઝડપે અને ગફલતભરી રીતે આવી રહેલા એક ભારેખમ ટ્રકના ચાલકે તેમના ટૂ-વ્હીલરને પાછળથી જોરદાર ટક્કર મારી દીધી હતી. ધડાકાભેર થયેલી ટક્કરને પગલે બાઇકનો કચ્ચરઘાણ વળી ગયો હતો અને પાછળ બેઠેલો કિશોર કરસન વાઘેલા ઉછળીને સીધો ડામરના રસ્તા પર પટકાયો હતો. ટ્રકનું ટાયર ફરી વળતાં સગીરનું ઘટનાસ્થળે જ પ્રાણપંખેરું ઊડી ગયું રસ્તા પર પટકાયેલા કરસન વાઘેલા કંઈ સમજે કે ઊભા થવાનો પ્રયાસ કરે તે પહેલાં જ પૂરપાટ આવી રહેલી ટ્રકનું તોતિંગ ટાયર તેના પર ફરી વળ્યું હતું. અતિ ગંભીર ઇજાઓ પહોંચવાના કારણે કરસનનું ઘટનાસ્થળે જ રક્તરંજિત હાલતમાં કરૂણ મોત નીપજ્યું હતું, જ્યારે આગળ બેઠેલા મિત્ર કિરણભાઈનો ચમત્કારિક બચાવ થયો હતો. મોડી રાત્રે બનેલી આ કરૂણ દુર્ઘટનાને પગલે આસપાસના વાહનચાલકો અને સ્થાનિક લોકો એકઠા થઈ ગયા હતા. બનાવની જાણ થતાં જ આઇ ડિવિઝન ટ્રાફિક પોલીસ કાફલો તાબડતોબ ઘટનાસ્થળે દોડી આવ્યો હતો અને મૃતદેહને પોસ્ટમોર્ટમ અર્થે હોસ્પિટલ ખસેડ્યો હતો. પોલીસે અકસ્માત સર્જી ભાગવાનો પ્રયાસ કરનાર ટ્રક ચાલક સામે ભારતીય ન્યાય સંહિતા અને મોટર વ્હીકલ એક્ટ હેઠળ ગુનો નોંધી તેની ધરપકડ કરી આગળની કાનૂની તપાસ તેજ કરી છે.