ભરૂચના સાયખામાં કન્સાઈ નેરોલેક પેઇન્ટ્સમાં મોકડ્રિલ યોજાઈ:ઇમરજન્સી રિસ્પોન્સ અને ટીમવર્ક ચકાસાયું; કર્મચારીઓને ફાયર સેફ્ટીની તાલીમ અપાઈ

ભરૂચ જિલ્લાના ઔદ્યોગિક સલામતી અને સ્વાસ્થ્ય વિભાગ દ્વારા સાયખા સ્થિત કન્સાઈ નેરોલેક પેઇન્ટ્સ લિમિટેડના પ્લાન્ટમાં મોકડ્રિલનું આયોજન કરવામાં આવ્યું હતું. ઔદ્યોગિક એકમોમાં સુરક્ષા અંગે જાગૃતિ વધારવા અને આકસ્મિક પરિસ્થિતિમાં ઝડપી પ્રતિસાદ આપવાની ક્ષમતા ચકાસવા માટે આ કવાયત હાથ ધરાઈ હતી. ઔદ્યોગિક સલામતી અધિકારીઓની હાજરીમાં ડેમો યોજાયો આ મોકડ્રિલમાં ઔદ્યોગિક સલામતી અને સ્વાસ્થ્ય વિભાગના નાયબ નિયામક ડી.બી. ગામીત વિશેષ હાજર રહ્યા હતા. કવાયત દરમિયાન આગ જેવી ઈમરજન્સી સ્થિતિમાં કર્મચારીઓએ કઈ રીતે તાત્કાલિક સુરક્ષિત સ્થળે પહોંચવું અને ઈમરજન્સી રિસ્પોન્સ ટીમે કેવી રીતે ઝડપી કાર્યવાહી કરવી તેનો વ્યવહારુ પ્રેક્ટિકલ ડેમો રજૂ કરવામાં આવ્યો હતો. ફાયર ટીમ દ્વારા કર્મચારીઓને અપાઈ વિશેષ તાલીમ ફાયર બ્રિગેડની ટીમે આગ બુઝાવવાની વિવિધ ટેકનિકો અને પદ્ધતિઓનું પ્રદર્શન કર્યું હતું. આ સાથે કર્મચારીઓને કટોકટીના સમયે સલામત બહાર નીકળવાના માર્ગો તેમજ તાત્કાલિક પ્રાથમિક સારવાર આપવા અંગે જરૂરી તાલીમ અપાઈ હતી. આ કવાયત દરમિયાન કર્મચારીઓની સલામતી નિયમોના પાલન અને ટીમવર્કની ક્ષમતાની સમીક્ષા પણ કરવામાં આવી હતી. નિયમિત મોકડ્રિલ યોજવા અધિકારીઓએ આપ્યું સૂચન નાયબ નિયામક ડી.બી. ગામીતે કંપનીની સુરક્ષા વ્યવસ્થાની પ્રશંસા કરીને નિયમિત ધોરણે આવી મોકડ્રિલ યોજવા સલાહ આપી હતી. કંપનીના યુનિટ હેડ રાજેશ પટેલે પણ સુરક્ષા નિયમોનું કડક પાલન કરવા કર્મચારીઓને પ્રોત્સાહિત કર્યા હતા. આ આયોજનથી કર્મચારીઓમાં ઔદ્યોગિક સુરક્ષા પ્રત્યે જાગૃતિ અને સંકલન વધુ મજબૂત બન્યા હતા.