ભુજમાં ઈદે મિલાદનો જુલુસ, હજારો જોડાયા:શહેરના મુખ્ય માર્ગો પરથી પસાર થયો, કોમી એકતાનો સંદેશ ગુંજ્યો

ભુજ શહેરમાં ઈદે મિલાદુન્નબીના પવિત્ર તહેવારની શ્રદ્ધાપૂર્વક ઉજવણી કરવામાં આવી હતી. મહેફિલે રસૂલ બાગ કમિટી દ્વારા જુલુસનું આયોજન કરાયું હતું, જેમાં હજારો લોકો જોડાયા હતા. સમગ્ર કચ્છ જિલ્લામાં પણ મુસ્લિમ સમાજે પરંપરાગત રીતે ઈદે મિલાદની ઉજવણી કરી હતી. આ જુલુસ ભુજ શહેરના ભીડ ગેટ વિસ્તારથી શરૂ થયો હતો. તે જૂના બસ સ્ટેશન, ઓલ્ફ્રેડ હાઈસ્કૂલ અને ખેંગારજી પાર્ક જેવા મુખ્ય માર્ગો પરથી પસાર થઈ ખારસરા ગ્રાઉન્ડ ખાતે સમાપ્ત થયો હતો. જુલુસમાં મોટી સંખ્યામાં મુસ્લિમ સમાજના લોકો જોડાયા હતા અને ધાર્મિક નારા લગાવ્યા હતા. ઈદે મિલાદના પાવન અવસર પર બાલ મુબારકની જિયારત, તકરીર અને ન્યાઝ જેવા ધાર્મિક કાર્યક્રમો યોજાયા હતા. જરૂરિયાતમંદોને મદદ કરવાના હેતુથી ખૈરાતનું પણ આયોજન કરાયું હતું. મુસ્લિમ બિરાદરોએ એકબીજાને ઈદની મુબારકબાદી પાઠવી અને મીઠાઈની આપલે કરી ખુશીઓ વહેંચી હતી. જુલુસના માર્ગ પર વિવિધ હિન્દુ-મુસ્લિમ સંસ્થાઓ અને આગેવાનો દ્વારા સ્વાગત કરવામાં આવ્યું હતું. અનેક સ્થળોએ જુલુસમાં જોડાયેલા લોકોનું સન્માન કરી તહેવારની શુભેચ્છાઓ પાઠવવામાં આવી હતી. આ આયોજન દરમિયાન ભાઈચારો અને કોમી એકતાની ભાવના સ્પષ્ટ જોવા મળી હતી. ભુજમાં યોજાયેલો ઈદે મિલાદનો આ જુલુસ માત્ર ધાર્મિક આસ્થાનું પ્રતીક નહોતો, પરંતુ શહેરની વિવિધ કોમો વચ્ચે પ્રેમ, સૌહાર્દ અને એકતાનો સંદેશ પણ આપી ગયો હતો.