વલસાડમાં આંગણવાડી-મધ્યાહન ભોજન કાર્યકર્તાઓની રેલી:BMSનું વિરોધ પ્રદર્શન, લઘુતમ વેતન સહિતની પડતર માંગણીઓ મુદ્દે કલેક્ટરને આવેદન

વલસાડમાં ભારતીય મજદૂર સંઘ (BMS) સંલગ્ન આંગણવાડી અને મધ્યાહન ભોજન યોજનાના કાર્યકર્તાઓ તથા હેલ્પરોએ તેમની પડતર માંગણીઓ માટે કલેક્ટર કચેરી ખાતે રેલી યોજી આવેદનપત્ર પાઠવ્યું હતું. મોટી સંખ્યામાં કર્મચારીઓ એકઠા થયા હતા અને વિરોધ પ્રદર્શન કર્યું હતું. કેસરી ક્રેપ અને બેનરો સાથે કર્મચારીઓએ જિલ્લા કલેક્ટર કચેરી પહોંચી ઉગ્ર રજૂઆત કરી હતી. આ પ્રદર્શનનો મુખ્ય હેતુ તેમની લાંબા સમયથી અટકેલી માંગણીઓ પર સરકારનું ધ્યાન દોરવાનો હતો. તેમની મુખ્ય માંગણીઓમાં માનદ વેતનમાં વધારો કરવાનો સમાવેશ થાય છે. કાર્યકર્તાઓ સવારે 10:00 થી સાંજે 5:00 વાગ્યા સુધી (લગભગ 10 કલાક) સતત કામગીરી કરે છે, છતાં તેમને માત્ર 4,500 રૂપિયા જેટલું ઓછું વેતન ચૂકવવામાં આવે છે. તેઓ લઘુતમ વેતન ચૂકવવાની માંગ કરી રહ્યા છે. બીજી મહત્વની માંગ ટ્રાન્સપોર્ટેશન અને ભાડા ખર્ચ સંબંધિત છે. કર્મચારીઓને કંટ્રોલમાંથી અનાજ લાવવાનો ટ્રાન્સપોર્ટેશન ખર્ચ પોતાના ખિસ્સામાંથી ભોગવવો પડે છે. આ માટે અલગથી ટ્રાન્સપોર્ટેશન ખર્ચ અને TA/DA ચૂકવવામાં આવે તેવી તેમની અપેક્ષા છે. શ્રમ કાયદામાં સુધારા પણ તેમની માંગણીઓનો એક ભાગ છે. તેઓ 'સમાન કામ - સમાન વેતન' ના અમલની સાથે સાથે સામાજિક સુરક્ષા (EPF, ESIC) પૂરી પાડવાની પણ માંગ કરી રહ્યા છે. આંગણવાડી કર્મચારી સંઘના પ્રતિનિધિ સંધ્યાબેને જણાવ્યું હતું કે, તેઓ સવારથી સાંજ સુધી અલ્પહાર યોજના, PFMS, IFMS જેવી વિવિધ યોજનાઓનું કામ કરે છે. તેમણે ભારપૂર્વક કહ્યું કે આટલી મોંઘવારીમાં 4,500 રૂપિયામાં ઘર ચલાવવું કે બાળકોનું શિક્ષણ પૂરું કરવું શક્ય નથી. સંધ્યાબેને ચેતવણી આપી હતી કે જો સરકાર તેમની માંગણીઓનો ઉકેલ નહીં લાવે, તો રાજ્યવ્યાપી આંદોલન અને ગાંધીચિંધ્યા માર્ગે ધરણા પ્રદર્શન કરવામાં આવશે.