ધારાસભ્ય ઉમેશ મકવાણાની અધ્યક્ષતામાં સાંકરડીમાં સેવા સેતુ કાર્યક્રમ:ગ્રામજનોએ વિવિધ સરકારી સેવાઓનો લાભ લીધો, અધિકારીઓને સ્થળ પર સૂચનાઓ અપાઈ

બોટાદના ધારાસભ્ય ઉમેશ મકવાણાની અધ્યક્ષતામાં સાંકરડી પ્રાથમિક શાળામાં સેવા સેતુ કાર્યક્રમ યોજાયો. સાંકરડી સહિત પાંચ ગામના લોકોએ સરકારી સેવાઓનો લાભ લીધો. મામલતદાર, TDO સહિતના અધિકારીઓ અને સ્થાનિક પદાધિકારીઓ હાજર રહ્યા. ધારાસભ્યએ લોકોને દાખલા-પ્રમાણપત્રો માટે ધક્કા ન ખાવા પડે અને ઘરે પહોંચાડવાની વ્યવસ્થા કરવા સૂચના આપી. તેમણે એક દીકરીનું ખોવાયેલું પ્રમાણપત્ર તાત્કાલિક કાઢી આપવા TDOને કહ્યું. આધારકાર્ડ સુધારા, નવા આધારકાર્ડની કામગીરી ઝડપી કરવા સૂચના અપાઈ. નામ-જન્મતારીખ સુધારાની મુશ્કેલ પ્રક્રિયા સરળ કરવા સરકારમાં રજૂઆતની ખાતરી અપાઈ. ધારાસભ્યએ આરોગ્ય સેવાઓ અને ICDS કામગીરી ચકાસી. ડાયાબિટીસની દવાઓ ઉપલબ્ધ કરાવવા રજૂઆતની વાત કરી. બાળકો-વાલીઓને પોષણ અંગે જાગૃત રહેવા અપીલ કરી. રેશનકાર્ડમાં જિલ્લાના નામની સમસ્યા પર સુધારાની ખાતરી અપાઈ.