ધ્રાંગધ્રાના જેસડામાં બોગસ ડોક્ટર ઝડપાયો:SOGએ મૂળ ઉત્તરાખંડના શખ્સની અટકાયત કરી ₹42,553ની દવાઓ જપ્ત કરી

સુરેન્દ્રનગર SOG શાખાએ ધ્રાંગધ્રા તાલુકાના જેસડા ગામમાંથી એક બોગસ ડોક્ટરને ઝડપી પાડ્યો છે. આ ડોક્ટર કોઈપણ માન્ય ડિગ્રી વગર એલોપેથીક દવાઓ આપીને તબીબી પ્રેક્ટિસ કરતો હતો. પોલીસે તેની પાસેથી ₹42,553.37ની કિંમતનો દવાઓનો જથ્થો જપ્ત કર્યો છે. SOG શાખાના એ.એસ.આઇ. અનિરૂધ્ધસિંહ મહિપતસિંહ ઝાલાને બાતમી મળી હતી. બાતમી મુજબ, ધ્રાંગધ્રા તાલુકાના જેસડા ગામમાં રવિન્દ્રનાથ ઉપેન્દ્રનાથ રોય (ઉં.વ. 54, મૂળ રૂદ્રપુર, ઉત્તરાખંડ) નામનો વ્યક્તિ ભાડાના મકાનમાં ડિગ્રી વગર એલોપેથીક દવાઓ આપીને સારવાર કરતો હતો. બાતમીના આધારે, SOG સ્ટાફે મોટી માલવણ PHCના ઇન્ચાર્જ મેડિકલ ઓફિસર ક્લાસ-2 જયમીનભાઈ ડી. જાદવને સાથે રાખીને જેસડા ગામમાં દરોડો પાડ્યો હતો. દરોડા દરમિયાન, આરોપી રવિન્દ્રનાથ ઉપેન્દ્રનાથ રોય સ્થળ પરથી મળી આવ્યો હતો. તેની પાસેથી વિવિધ એલોપેથીક દવાઓનો મોટો જથ્થો મળી આવ્યો હતો. પોલીસે રવિન્દ્રનાથ ઉપેન્દ્રનાથ રોય વિરુદ્ધ ધ્રાંગધ્રા તાલુકા પોલીસ સ્ટેશનમાં મેડિકલ પ્રેક્ટિશનર એક્ટની કલમ-30 હેઠળ ગુનો નોંધી વધુ કાર્યવાહી હાથ ધરી છે.