ધ્રોલ દુષ્કર્મ કેસ: આરોપીને 10 વર્ષની સખત કેદ:કોર્ટે 4 લાખ વળતર અને 18 હજાર દંડ ચૂકવવા આદેશ કર્યો

જામનગર જિલ્લાના ધ્રોલ પંથકમાં સગીરા પર દુષ્કર્મ આચરવાના ગંભીર કેસમાં અદાલતે આરોપીને દોષિત ઠેરવી 10 વર્ષની સખત કેદની સજા ફટકારી છે. આ ઉપરાંત, કોર્ટે આરોપીને ભોગ બનનાર સગીરાને 4 લાખ રૂપિયા વળતર પેટે ચૂકવવા અને 18,000 રૂપિયાનો દંડ પણ કર્યો છે. કેસની વિગત મુજબ, આરોપી રામ રૂપ શિવસદન લોધે (ઉં.વ. 22, રહે. મેટોડા) એ ફરિયાદીની 16 વર્ષીય સગીર વયની દીકરી સાથે પરિચય કેળવ્યો હતો. આરોપીએ મોબાઈલ ફોન પર વાતચીત કરીને સગીરાને પ્રેમજાળમાં ફસાવી હતી અને લગ્નની લાલચ આપી હતી. તારીખ 3 નવેમ્બર 2019 ના રોજ રાત્રિના સમયે આરોપી સગીરાને રાજકોટથી અમદાવાદ લઈ ગયો હતો. ત્યાંથી તેને માછા ગામે મોકલી આપી રાત્રિ દરમિયાન તેની સાથે દુષ્કર્મ આચર્યું હતું. આ મામલે ભોગ બનનારના પરિવારે ધ્રોલ પોલીસ સ્ટેશનમાં ફરિયાદ નોંધાવી હતી, જેના આધારે પોલીસે ગુનો નોંધી કાયદેસરની કાર્યવાહી હાથ ધરી હતી. આ કેસ જામનગરની સ્પેશિયલ પોક્સો (POCSO) કોર્ટમાં ચાલી ગયો હતો. સરકાર પક્ષે કુલ 6 સાક્ષીઓની જુબાની લેવામાં આવી હતી અને 62 જેટલા દસ્તાવેજી પુરાવાઓ રજૂ કરવામાં આવ્યા હતા. પોક્સો કોર્ટના જજ આર. પી. મોગેરાએ સરકાર પક્ષની દલીલોને ગ્રાહ્ય રાખી આરોપી રામ રૂપ લોધેને તકસીરવાર ઠેરવ્યો હતો. કોર્ટે તેને 10 વર્ષની સખત કેદની સજા ફટકારી છે. અદાલતે આરોપીને 18,000 રૂપિયાનો દંડ પણ કર્યો છે. જો આરોપી આ દંડ ન ભરે તો તેને વધુ એક વર્ષની સખત કેદ ભોગવવી પડશે. આ ઉપરાંત, ભોગ બનનાર સગીરાને વળતર પેટે 4 લાખ રૂપિયા ચૂકવવાનો પણ હુકમ કરવામાં આવ્યો છે. આ કેસમાં સરકાર તરફે સરકારી વકીલ ભારતીબેન વાદી રોકાયેલા હતા.