ગુજરાતમાં વર્ગ-1 અધિકારીઓની મોટાપાયે બદલી:144 અધિકારીઓની બદલી-નિમણૂક, અનેક જિલ્લાઓમાં નવા પ્રાંત અધિકારી અને ડેપ્યુટી કલેક્ટર

ગુજરાત સરકારે વહીવટી તંત્રમાં મોટો ફેરફાર કરતાં વર્ગ-1 સંવર્ગના 144 અધિકારીઓની બદલી અને નિમણૂકના આદેશો કર્યા છે. મહેસૂલ વિભાગ દ્વારા જારી કરાયેલા આ હુકમથી વિવિધ જિલ્લાઓમાં ડેપ્યુટી કલેક્ટર, પ્રાંત અધિકારી, જિલ્લા વિકાસ અધિકારી સહિતના મહત્વના પદો પર અધિકારીઓની જવાબદારી બદલાઈ છે. સરકારના આદેશ મુજબ ડેપ્યુટી કલેક્ટર, પ્રાંત અધિકારી, જિલ્લા વિકાસ અધિકારી અને અન્ય સમકક્ષ વર્ગ-1 અધિકારીઓની બદલી કરવામાં આવી છે. કેટલાક અધિકારીઓને એક જ જિલ્લામાં અન્ય જવાબદારી સોંપવામાં આવી છે, જ્યારે કેટલાકની અન્ય જિલ્લામાં બદલી કરવામાં આવી છે. જુઓ બદલી કરાયેલા અધિકારીઓના નામની સંપૂર્ણ યાદી બદલી પામેલા અધિકારીઓમાં પલક આર. ત્રિવેદીને સુરત સ્ટેમ્પ ડ્યૂટી ડિવિઝન-1ના ડેપ્યુટી કલેક્ટર પદેથી સાબરકાંઠાના ખેડબ્રહ્માના પ્રાંત અધિકારી બનાવાયા છે. બી. કે. રાઠોડને મહેસાણા નાયબ જિલ્લા વિકાસ અધિકારી પદેથી અમદાવાદ મ્યુનિસિપલ કોર્પોરેશનના ડેપ્યુટી કલેક્ટર તરીકે મૂકાયા છે. એ. બી. જાદવને ભુજના પ્રાંત અધિકારી પદેથી મહેસાણા ડેપ્યુટી જિલ્લા વિકાસ અધિકારી તરીકે બદલી કરાઈ છે. દ્વારકામાં પણ બદલી અલગ હુકમથી વાય. પી. ગઢવીની ડેપ્યુટી કલેક્ટર-1, કલેક્ટર કચેરી દ્વારકા પદેથી દ્વારકા જિલ્લાના પ્રાંત અધિકારી તરીકે નિમણૂક કરવામાં આવી છે. 2019 બેચના અધિકારીને બઢતી હુકમમાં કેતન ચાવડા, મામલતદાર વર્ગ-2ને પણ બઢતી આપવામાં આવી છે. હાલના પગાર ધોરણ મેટ્રિક્સ લેવલ-8 (₹44,900-1,42,400) માંથી તેમને વર્ગ-1 સંવર્ગના મેટ્રિક્સ લેવલ-10 (₹56,100-1,77,500) ના પગાર ધોરણમાં બઢતી આપીને મામલતદારની ખાલી જગ્યા પર નિમણૂક કરવાની જોગવાઈ કરવામાં આવી છે. તેમની બઢતી ડિમ્ડ ડેટ 25 ઓક્ટોબર, 2024થી ગણાશે.