જન્માષ્ટમી પર્વે સુરત શહેરને સુરક્ષાની ભેટ:કાયદો-વ્યવસ્થા સુદ્રઢ કરવા પોલીસને મળી 65 નવી હાઇટેક PCR વાન, પોલીસ કમિશનર સહિત ઉચ્ચ અધિકારીઓએ કરાવ્યું ફ્લેગ ઓફ

જન્માષ્ટમીના પાવન પર્વે સુરત શહેરની જનસુરક્ષા અને કાયદો-વ્યવસ્થાને વધુ સુદ્રઢ બનાવવાના હેતુથી રાજ્ય સરકાર દ્વારા શહેર પોલીસને 65 નવી આધુનિક PCR (પોલીસ કંટ્રોલ રૂમ) વાન ફાળવવામાં આવી છે. રાજ્યભરમાં સુરક્ષા વધારવા સરકારે ફાળવેલી કુલ 500 PCR વાન પૈકી સુરત શહેરને આ વાહનો મળ્યા છે, જેને તહેવારના દિવસથી જ નાગરિકોની સુખ, શાંતિ અને સલામતી અર્થે કાર્યરત કરી દેવામાં આવ્યા છે. ટોચના પોલીસ અધિકારીઓની ઉપસ્થિતિમાં ફ્લેગ ઓફ આ પ્રસંગે સુરત શહેર પોલીસ કમિશનર વાબાંગ જામીર, સેક્ટર-1ના અધિક પોલીસ કમિશનર બલરામ મીણા, સેક્ટર-2ના અધિક પોલીસ કમિશનર મહેન્દ્ર બગડીયા તેમજ અધિક પોલીસ કમિશનર ડો. કરનરાજ વાઘેલા સહિતના ઉચ્ચ પોલીસ અધિકારીઓ ઉપસ્થિત રહ્યા હતા. અધિકારીઓએ વાહનોનું નિરીક્ષણ કરી શહેરીજનોની સેવામાં તેને વિધિવત રીતે વિવિધ વિસ્તારોમાં પેટ્રોલિંગ માટે રવાના કર્યા હતા. ઝડપી રિસ્પોન્સ અને ગુનાખોરી પર અંકુશ મેળવવામાં મદદ મળશે આધુનિક ટેકનોલોજી અને સાધનોથી સજ્જ આ વાહનો શહેરમાં કાર્યરત થવાથી પોલીસનું પેટ્રોલિંગ વધુ સઘન બનશે. ઈમરજન્સીના સમયે નાગરિકો સુધી ગણતરીની મિનિટોમાં પોલીસ મદદ પહોંચી શકશે. તહેવારોના દિવસોમાં શહેરમાં શાંતિ જળવાઈ રહે અને અસામાજિક તત્વો તેમજ ગુનાખોરી પર કડક અંકુશ રાખી શકાય તે માટે આ કાફલો મહત્વનો સાબિત થશે.