માત્ર ફરિયાદ નહીં, વાસ્તવિક ઘટનાની ખરાઈ થશે:કૂતરાં કરડવાની રોજની 20 ફરિયાદો વચ્ચે નવી પોલિસી કોર્પોરેશન લાવશે, શ્વાન આતંક સામે તંત્ર એક્શનમાં

શહેરી વિસ્તારોમાં રખડતાં શ્વાનનો ત્રાસ અને કૂતરાં કરડવાના બનાવોમાં ચિંતાજનક ઉછાળો નોંધાતાં નાગરિકોમાં ભારે ભયનો માહોલ જોવા મળી રહ્યો છે. શહેરમાં દરરોજ સરેરાશ 20 જેટલી ગંભીર ફરિયાદો માત્ર કૂતરાં કરડવાની નોંધાઈ રહી છે, જેને પગલે મ્યુનિસિપલ કોર્પોરેશનનું તંત્ર દોડતું થયું છે. વધતા જતા પ્રજાકીય આક્રોશ વચ્ચે રખડતા કૂતરાઓ પકડવા અને તેના સંચાલન અંગેની હાલની પોલિસીમાં ધરમૂળથી ફેરફાર કરવા માટે મ્યુનિસિપલ વહીવટી તંત્ર દ્વારા ગંભીર વિચારણા હાથ ધરવામાં આવી છે. નાગરિકોની સલામતી સુનિશ્ચિત કરવા સાથે અબોલ પશુઓ પ્રત્યેના નિયમોનું પાલન થાય તે દિશામાં નવી વ્યાપક કાર્ય યોજના તૈયાર થઈ રહી છે. જૂની સિસ્ટમથી સમસ્યા યથાવત રહેતી હોવાની વ્યાપક રાવ હાલના નિયમો અનુસાર કંટ્રોલ રૂમમાં ફરિયાદ મળ્યા બાદ મ્યુનિસિપલ ટીમ જે-તે વિસ્તારમાંથી કૂતરાંને પકડીને લઈ જાય છે અને નિયત રસીકરણ તેમજ ખસીકરણ જેવી પ્રક્રિયા પૂર્ણ કર્યા બાદ ફરીથી તેને એ જ વિસ્તારમાં છોડી દેવામાં આવે છે. આ વ્યવસ્થાના કારણે કરડવાની પ્રવૃત્તિ ધરાવતા આક્રમક શ્વાન ફરી પાછા એ જ સોસાયટી કે મહોલ્લામાં પહોંચી જતાં સ્થાનિક રહીશો માટે સતત જોખમ ઊભું રહેતું હતું. આ ત્રાસમાંથી કાયમી છુટકારો ન મળતાં રહીશોમાં તંત્રની કામગીરી સામે ભારે નારાજગી જોવા મળી રહી હતી, જેના કારણે સમગ્ર પ્રક્રિયાની પુનઃસમીક્ષા કરવી અનિવાર્ય બની હતી. શ્વાનની ઓળખ, વર્તણૂક અને સ્થળાંતર અંગે સ્પષ્ટ નિયમો ઘડાશે આ પરિસ્થિતિના કાયમી અને વ્યવહારુ નિરાકરણ માટે કોર્પોરેશન હવે શ્વાનની ઓળખ, તેમની વર્તણૂક, કરડવાની પ્રકૃતિ અને ફરિયાદની સત્યાર્થતા ચકાસીને જ આગળનું પગલું ભરશે. આક્રમક કૂતરાઓને પકડ્યા બાદ તેમને ક્યાં આશરો આપવો અથવા કયા સલામત વિસ્તારમાં રાખવા તે અંગે સુધારેલી માર્ગદર્શિકા બનાવવામાં આવી રહી છે. માત્ર મૌખિક કે સામાન્ય ફરિયાદના આધારે દોડી જવાને બદલે ઘટનાની વાસ્તવિકતા અને ઉપલબ્ધ પુરાવાઓની ખરાઈ કરીને જ ટીમો કાર્યવાહી કરે તેવી વૈજ્ઞાનિક પદ્ધતિ અમલમાં મૂકવાની યોજના છે. વાસ્તવિકતાની ચકાસણી થકી વિવાદો અટકશે નાગરિકો તરફથી મળતી દૈનિક ફરિયાદો અને જમીની હકીકત વચ્ચે ઘણીવાર મોટો તફાવત જોવા મળતો હોય છે, જેથી નવી પોલિસીમાં ફરિયાદોના યોગ્ય વેરિફિકેશનને વિશેષ પ્રાધાન્ય આપવામાં આવશે. આ પગલાંથી એક તરફ નિર્દોષ નાગરિકો અને ખાસ કરીને નાના બાળકો તેમજ વૃદ્ધોની સુરક્ષા મજબૂત બનશે તો બીજી તરફ બિનજરૂરી રીતે કૂતરાંને હેરાન કરવાની કે ખોટી ફરિયાદોના આધારે પકડવાની પ્રવૃત્તિઓ પર પણ લગામ કસાશે. મ્યુનિસિપલ કોર્પોરેશન ટૂંક સમયમાં આ નવી પોલિસીને સત્તાવાર મંજૂરી આપીને તેનો કડક અમલ શરૂ કરશે.