મોરબી નજીક દારૂ ભરેલી ક્રેટા કાર સાથે એક પકડાયો:₹5.55 લાખનો મુદ્દામાલ જપ્ત, 3 આરોપીઓની શોધખોળ

મોરબી તાલુકા પોલીસે વાંકાનેર તરફથી આવી રહેલી એક ક્રેટા કારમાંથી 700 લિટર દેશી દારૂનો જથ્થો ઝડપી પાડ્યો છે. આ કાર્યવાહી લાલપર ગામ નજીક મોરબી-વાંકાનેર નેશનલ હાઈવે પર કરવામાં આવી હતી. પોલીસે રૂ. 5.55 લાખનો મુદ્દામાલ જપ્ત કરી એક આરોપીની ધરપકડ કરી છે, જ્યારે અન્ય ત્રણની શોધખોળ ચાલુ છે. પોલીસ પેટ્રોલિંગ દરમિયાન GJ 10 CG 4630 નંબરની સફેદ ક્રેટા કારને રોકવામાં આવી હતી. કારની તલાશી લેતા તેમાંથી રૂ. 1.40 લાખની કિંમતનો 700 લિટર દેશી દારૂ, રૂ. 4 લાખની ક્રેટા કાર અને રૂ. 15 હજારના બે મોબાઈલ ફોન મળી આવ્યા હતા. પોલીસે કુલ રૂ. 5.55 લાખનો મુદ્દામાલ કબજે કર્યો છે. આ કેસમાં સલીમભાઈ ઉર્ફે સલો બાબુભાઈ વિકિયાણી (રહે. સરાયા, તા. ટંકારા) નામના આરોપીની ધરપકડ કરવામાં આવી છે. તેની પ્રાથમિક પૂછપરછમાં દારૂનો જથ્થો મંગાવનાર તરીકે ઈરફાન (રહે. મોરબી), સદ્દામભાઈ જામ (રહે. મોરબી) અને સલીમ ઉર્ફે રાહુલભાઈ પઠાણ (રહે. મોરબી) ના નામ સામે આવ્યા છે. મોરબી તાલુકા પોલીસ સ્ટેશનમાં ચારેય આરોપીઓ વિરુદ્ધ ગુનો નોંધવામાં આવ્યો છે. પીઆઈ એન.એસ. ઘેટીયાની સૂચના મુજબ પોલીસ સ્ટાફ દ્વારા આ કામગીરી કરવામાં આવી હતી. હાલમાં ફરાર થયેલા અન્ય ત્રણ આરોપીઓને ઝડપી પાડવા માટે વધુ તપાસ હાથ ધરવામાં આવી છે.