મૃતક મહિલાના નામે કૃષિ લોન કૌભાંડ:મહીસાગરમાં 7 આરોપી ઝડપાયા, બેંક કર્મચારીઓની સંડોવણીની પણ તપાસ

મહીસાગર જિલ્લાના ખાનપુર તાલુકાના કાળા ખેતરા ગામમાં એક મૃતક મહિલાના નામે કૃષિ લોન ઉપાડવાનું કૌભાંડ સામે આવ્યું છે. આ મામલે લુણાવાડા ટાઉન પોલીસે કાર્યવાહી કરી 7 આરોપીની ધરપકડ કરી છે. કાળા ખેતરા ગામની કેસરબેન નામની મૃતક મહિલાના નામે કૃષિ લોન ઉપાડી લેવાઈ હોવાની ફરિયાદ લુણાવાડા ટાઉન પોલીસ સ્ટેશનમાં નોંધાઈ હતી. આ ફરિયાદના આધારે પોલીસે તપાસ શરૂ કરી હતી. તપાસમાં મુખ્ય આરોપી કિરીટભાઈ કાળુભાઈ માછી ઝડપાયો છે. તે એજન્ટ તરીકે કામ કરતો હોવાનું સામે આવ્યું છે. પોલીસે અન્ય આરોપી જયમલકુમાર ભુપતસિંહ માલીવાડ પાસેથી અલગ-અલગ સરપંચો અને તલાટીઓના સિક્કાઓ પણ જપ્ત કર્યા છે. આ સિક્કાઓનો ઉપયોગ કૌભાંડમાં કેવી રીતે થયો, તે અંગે પોલીસ વધુ તપાસ કરી રહી છે. પોલીસે કેનેરા બેંકમાંથી શંકાસ્પદ લાગતી 12 જેટલી ફાઈલો પણ જપ્ત કરી છે. છેલ્લા દોઢ વર્ષમાં કેનેરા બેંકમાંથી કૃષિ લોનના નામે લેવાયેલી લોનની પણ પોલીસ તપાસ કરી રહી છે. આ કૌભાંડમાં બેંકના કોઈ કર્મચારીઓની સંડોવણી છે કે કેમ, તે દિશામાં પણ તપાસ ચાલી રહી છે. પોલીસ તપાસ આગળ વધતા કૌભાંડની વધુ વિગતો સામે આવવાની શક્યતા છે. ઝડપાયેલા સાત આરોપી મુખ્ય સવાલ એ છે કે મૃતકના નામે લોન કેવી રીતે મંજૂર થઈ અને તેમાં અન્ય કેટલા લોકોની સંડોવણી છે. પોલીસની તપાસમાં હવે આ કૌભાંડની વધુ કડીઓ બહાર આવે તેવી શક્યતા છે.