ગીરગઢડા હનીટ્રેપ કેસ:ત્રણ માસથી ફરાર બે આરોપી સુરતના ઓલપાડમાંથી ઝડપાયા, ખોટા કેસમાં ફસાવી દેવાની ધમકી આપી પૈસા પડાવતા

ગીર સોમનાથ જિલ્લામાં હનીટ્રેપના ગુનામાં છેલ્લા ત્રણેક મહિનાથી નાસતા ફરતા બે આરોપીઓને ગીર સોમનાથ SOGએ સુરત ગ્રામ્યના ઓલપાડ વિસ્તારમાંથી ઝડપી પાડ્યા છે. ટેકનિકલ એનાલિસિસ અને હ્યુમન સોર્સિસના આધારે પોલીસે બંને આરોપીઓ સુધી પહોંચવામાં સફળતા મેળવી હતી. બંનેને જરૂરી કાર્યવાહી બાદ ગીરગઢડા પોલીસ સ્ટેશનને સોંપવામાં આવ્યા છે. ત્રણ મહિનાથી પોલીસ પકડથી દૂર હતા ગીરગઢડા પોલીસ સ્ટેશનમાં નોંધાયેલા ગુનામાં BNS કલમ 308(7) સહિતની કલમો હેઠળ કાર્યવાહી ચાલી રહી હતી. આ ગુનામાં સંડોવાયેલા બંને આરોપીઓ છેલ્લા ત્રણેક મહિનાથી પોલીસ પકડથી દૂર હતા. SOGના ASI જીજ્ઞેશગીરી અમૃતગીરી, ASI સરમણભાઇ ભોપાભાઇ સહિતના કર્મચારીઓએ ગુનાનો ઝીણવટપૂર્વક અભ્યાસ કરી આરોપીઓના સંભવિત સ્થળો અંગે માહિતી એકત્ર કરી હતી. ઓલપાડમાં વોચ ગોઠવી બંનેને ઝડપી પાડ્યા તપાસ દરમિયાન આરોપીઓ સુરત ગ્રામ્ય વિસ્તારમાં હોવાની કડી મળતાં SOGની ટીમ સુરત પહોંચી હતી. ઓલપાડ પોલીસ સ્ટેશનની ટીમની મદદથી ટેકનિકલ એનાલિસિસ અને હ્યુમન સોર્સિસના આધારે આરોપીઓ પર નજર રાખવામાં આવી હતી. અંતે ઓલપાડ વિસ્તારમાંથી બંને આરોપીઓને ઝડપી પાડવામાં આવ્યા હતા. પોલીસની ખોટી ઓળખ ઉભી કરી નાણાં પડાવતા હોવાનો આરોપ પોલીસના જણાવ્યા અનુસાર, આરોપીઓ લોકોનો સંપર્ક કરી તેમને ખોટા કેસમાં ફસાવી દેવાની ધમકી આપતા હતા. ત્યારબાદ પોલીસની ખોટી ઓળખ ઊભી કરીને નાણાં પડાવવાની મોડસ ઓપરેન્ડી અપનાવતા હોવાની વિગતો તપાસમાં સામે આવી છે. મહિલા અને પુરુષ આરોપીની ધરપકડ પોલીસે ઝડપેલા આરોપીઓમાં ભારતીબેન અશોકભાઇ ગઢાધરા (ઉંમર 45 વર્ષ), રહે. સ્કાઇલાઇન, ઓલપાડ અને ચિરાગ નિતેશભાઇ પરમાર (ઉંમર 26 વર્ષ), રહે. અક્ષર એપાર્ટમેન્ટ, કતારગામનો સમાવેશ થાય છે. પોલીસ તપાસ દરમિયાન ભારતીબેન ગઢાધરા સામે કોડીનાર કોર્ટના પોક્સો કેસ નં. 08/2025ના કામે પકડ વોરંટ ઇશ્યુ થયેલું હોવાનું પણ સામે આવ્યું છે. આ અંગે પોલીસે અલગથી કાયદેસરની કાર્યવાહી હાથ ધરી છે.