અરવલ્લીના મોડાસામાં હર ઘર તિરંગા યાત્રા યોજાઈ:નગરના રસ્તાઓ પર તિરંગા ધ્વજ સાથે લાંબી રેલી નીકળી

અરવલ્લી જિલ્લાના મુખ્ય મથક મોડાસામાં 'હર ઘર તિરંગા' અભિયાન અંતર્ગત ભવ્ય તિરંગા યાત્રાનું આયોજન કરવામાં આવ્યું હતું. આ યાત્રામાં નગરના રસ્તાઓ પર તિરંગા ધ્વજ સાથે લાંબી રેલી કાઢવામાં આવી હતી, જેમાં દરેકના હાથમાં તિરંગો લહેરાતો જોવા મળ્યો હતો. આ યાત્રામાં પોલીસ વિભાગ, જિલ્લા વહીવટી તંત્ર, નગરપાલિકા, શિક્ષણ વિભાગ, યુવા કલ્યાણ વિભાગ તેમજ સ્વયંસેવક સંસ્થાઓના કાર્યકરો અને મોટી સંખ્યામાં નાગરિકોએ સક્રિય ભાગ લીધો હતો. બાળકો, યુવાનો, મહિલાઓ અને વરિષ્ઠ નાગરિકોએ એકસાથે તિરંગો હાથમાં લઈને દેશભક્તિનો ઉત્સાહ દર્શાવ્યો હતો. મોડાસા નગરના વિવિધ વિસ્તારોમાંથી પસાર થતી આ યાત્રા દરમિયાન ઠેર ઠેર સાંસ્કૃતિક કાર્યક્રમો અને દેશભક્તિના ગીતો ગુંજી ઉઠ્યા હતા. રસ્તાઓ પર તિરંગાના રંગોથી વાતાવરણ સજાયેલું હતું, જેનાથી સમગ્ર નગરમાં દેશપ્રેમની લાગણી છવાઈ ગઈ હતી. આ તિરંગા યાત્રા રાષ્ટ્રીય અસ્મિતા, એકતા અને ગૌરવનું પ્રતીક બની રહી હતી. તિરંગો એકતા, સમાનતા અને બલિદાનની ભાવના સાથે રાષ્ટ્રના વિકાસમાં પ્રત્યેક નાગરિકના યોગદાનનો સંદેશ આપે છે. તે સ્વતંત્રતા માટે અસંખ્ય શહીદોના બલિદાનની યાદ અપાવે છે. આ કાર્યક્રમમાં અરવલ્લી જિલ્લાના હોદ્દેદારો, પદાધિકારીઓ, જિલ્લા વહીવટી તંત્રના અધિકારીઓ અને પોલીસ વિભાગના અધિકારીઓ પણ જોડાયા હતા. કાર્યક્રમના અંતે 'હર ઘર તિરંગા' અભિયાનના સંદેશને વધુ વ્યાપક બનાવવાની અપીલ કરવામાં આવી હતી. મોડાસાની આ તિરંગા યાત્રાએ જિલ્લામાં દેશભક્તિની ભાવનાને નવો જોશ આપ્યો છે.