મીઠી મૂંઝવણ:મને છોકરા -છોકરી બંને આકર્ષે છે, શું આ આકર્ષણ યોગ્ય છે?

મોહિની મહેતા પ્રશ્ન: મારી ઉંમર 24 વર્ષની છે ઓફિસમાં મને એક છોકરી ગમે છે. તેનો સ્વભાવ મળતાવડો છે તેના કારણે તે દરેક પુરુષ સાથે હસી મજાકથી વાતો કરે છે આથી ઘણી વાર મને મૂંઝવણ થાય છે કે તે માત્ર મિત્ર તરીકે મારી સાથે વાત કરે છે કે ખરેખર તે પણ મને પસંદ કરે છે તે કેવી રીતે જાણવું?{ એક યુવક ઉત્તર: પહેલાં તો એ જાણો કે શું તે અન્ય પુરુષો કરતાં તમારી સાથે વધુ સમય વિતાવે છે? જો તે ઓફિસ સિવાય પણ તમને સામેથી મેસેજ કે કોલ કરે અથવા લંચમાં તમારી સાથે બેસવાનું પસંદ કરે, તો તે સારા સંકેત છે. તે તમારી સાથે માત્ર ઓફિસની વાતો કરવાને બદલે તેના પરિવાર, તેની ઈચ્છાઓ અને અંગત જીવનની વાતો શૅર કરતી હોય, વાત કરતી વખતે સતત આઈ-કોન્ટેક્ટ રાખવો, તમારી વાતો પર વધારે હસવું અને તમારી નાની-નાની બાબતો (જેમ કે નવો શર્ટ કે હેરસ્ટાઈલ) પર નોટિસ કરીને કોમ્પ્લીમેન્ટ્સ આપવા આ બધા સંકેતો મળે તો સમજવું કે એને પણ તમારા માટે લાગણી છે. જો તમને આ બધા સંકેતો મળે તો એક વખત હિંમત કરી ઓફિસ બહાર કોફી કે લંચ માટે પૂછી જુઓ, જો તે હા પાડે તો સમજવું કે એ પણ તમને ગમાડે છે . પ્રશ્ન: હું 22ની છું મને માસ્ટરબેશનની આદત પડી ગઈ છે, તેનાથી આગળ જતા કોઈ નુકસાન તો નહીં થાય ને?{ એક યુવતી ઉત્તર: હસ્તમૈથુન (માસ્ટરબેશન) એ એક સંપૂર્ણપણે સામાન્ય, કુદરતી અને સલામત પ્રક્રિયા છે. તબીબી વિજ્ઞાન અનુસાર, મર્યાદિત પ્રમાણમાં કરવામાં આવતા હસ્તમૈથુનથી ભવિષ્યમાં લગ્નજીવન, પ્રેગ્નન્સી કે શારીરિક ક્ષમતા પર કોઈ પણ પ્રકારની નકારાત્મક અસર પડતી નથી. સામાજિક માન્યતાઓ અને અફવાઓના કારણે આને લઈને લોકોમાં બિનજરૂરી ડર અને ગિલ્ટ જોવા મળે છે, જે માનસિક સ્વાસ્થ્યને નુકસાન પહોંચાડી શકે છે. પરંતુ, જો આ એક આદત બની જાય અને તેની દૈનિક જીવન પર અસર થવા લાગે, તો કેટલીક બાબતોનું ધ્યાન રાખવું જરૂરી છે. જેમ કે, અતિશય હસ્તમૈથુન કરવાથી ગુપ્તાંગની આસપાસ ત્વચામાં બળતરા અથવા થોડો સોજો આવી શકે છે. જો તમે તણાવ કે એકલતા દૂર કરવા માટે વારંવાર આનો આશરો લો છો, તો તે તમારા કામ અને અભ્યાસ પરથી ધ્યાન હટાવી શકે છે. ઇન્ફેક્શનથી બચવા માટે હસ્તમૈથુન પહેલાં અને પછી પૂરતી શારીરિક સ્વચ્છતા રાખવી અનિવાર્ય છે. જો આ આદત તમારા મન પર હાવી થઈ રહી હોય, તો તમારું ધ્યાન અન્ય પ્રવૃત્તિઓ જેમ કે કસરત, તમારા શોખ અથવા મિત્રો સાથે વિતાવવા તરફ વાળો. જો કોઈ મૂંઝવણ રહે, તો નિઃસંકોચપણે ગાયનેકોલોજિસ્ટ અથવા કાઉન્સિલરની સલાહ લો. પ્રશ્ન: મારી ઉંમર 21 વર્ષની છે મારી બોડી પ્રમાણે મારા સ્તન વધારે ભરાવદાર લાગે છે જેના કારણે ટી-શર્ટ કે કોઈ પણ કપડાં પહેરું ત્યારે ક્ષોભ અનુભવાય છે. મારી આ સમસ્યાના નિવારણ માટે કોઈ ઉપાય જણાવશો?{ એક યુવતી ઉત્તર: 21 વર્ષની ઉંમરે શરીરના વિકાસ સાથે સ્તનોનું ભરાવદાર હોવું એક સામાન્ય શારીરિક બાબત છે, જેના માટે ક્ષોભ કે શરમ અનુભવવાની બિલકુલ જરૂર નથી. સ્તનનો મુખ્ય ભાગ ચરબી અને ગ્લેન્ડ્યુલર ટિશ્યુથી બનેલો હોય છે. જો આને કારણે તમને અસ્વસ્થતા થતી હોય, તો તેને કુદરતી રીતે યોગ્ય શેપમાં લાવી શકાય છે. આ માટે કાર્ડિયો એક્સરસાઇઝ કરી શકો છો. શરીરમાંથી એક જગ્યાએથી ચરબી ઘટાડવી શક્ય નથી. તેથી રોજ 30 થી 40 મિનિટ રનિંગ, જોગિંગ, સાઇકલિંગ કે સ્વિમિંગ કરવાથી આખા શરીરની ચરબી ઘટશે, જેનાથી સ્તનનું કદ પણ કુદરતી રીતે ઓછું થશે. આ ઉપરાંત પુશ-અપ્સ, ચેસ્ટ પ્રેસ અને ડમ્બબેલ ફ્લાય જેવી કસરતો કરવાથી સ્તનની નીચેના સ્નાયુઓ મજબૂત થાય છે. આનાથી છાતીના ભાગને યોગ્ય લિફ્ટ અને ટોનિંગ મળે છે, જેથી તે સુડોળ અને નાના દેખાય છે. પ્રોટીન, લીલા શાકભાજી અને ફળોથી ભરપૂર આહાર લો. વધુ કેલરીવાળો ખોરાક, જંક ફૂડ અને તળેલી વસ્તુઓ ખાવાનું ટાળો જેથી શરીરમાં વધારાની ચરબી જમા ન થાય. તેમજ બજારમાં મિનિમાઈઝર બ્રા અને સારી સપોર્ટિવ સ્પોર્ટ્સ બ્રા મળે છે, જે સ્તનને સપોર્ટ આપીને તેનો ફેલાવો ઓછો કરે છે, જેથી કપડાં પહેરતી વખતે કદ નાનું દેખાય છે. ડાર્ક રંગના અને યોગ્ય ફિટિંગવાળા ટી-શર્ટ પહેરવાથી પણ તમે આત્મવિશ્વાસ અનુભવશો. આ પ્રક્રિયામાં સમય લાગે છે, તેથી ધીરજ રાખો. જો આ બધી ટિપ્સ છતાં કોઈ ફેરફાર ન જણાય તો તમે ગાયનેકોલોજિસ્ટની સલાહ લઈ શકો છો. પ્રશ્ન: મારી ઉંમર 26 વર્ષની છે મને છોકરા અને છોકરીઓ બંને આકર્ષે છે, આ કારણે ઘણી વખત ડર લાગે છે કે મારામાં કોઈ ખામી તો નથી ને, આ પ્રકારનું આકર્ષણ યોગ્ય છે?{ એક યુવક ઉત્તર: 26 વર્ષની ઉંમરે છોકરા અને છોકરીઓ બંને તરફ આકર્ષણ અનુભવવું એ સંપૂર્ણપણે સામાન્ય પ્રક્રિયા છે. તમારામાં કોઈપણ પ્રકારની શારીરિક, માનસિક કે હોર્મોનલ ખામી નથી. માનવજાતમાં જાતીય આકર્ષણ વૈવિધ્યસભર હોય છે. જ્યારે કોઈ વ્યક્તિ બંને લિંગ (પુરુષ અને સ્ત્રી) પ્રત્યે આકર્ષણ અનુભવે છે, ત્યારે તબીબી રીતે તેને બાયસેક્સ્યુઆલિટી કહેવામાં આવે છે. આ કોઈ બીમારી કે મનની વિકૃતિ નથી. વિશ્વભરના અગ્રણી મનોચિકિત્સકો અને વૈજ્ઞાનિક સંગઠનો (જેવા કે WHO) એ સ્પષ્ટ કર્યું છે કે, બાયસેક્સ્યુઆલિટી એ મનુષ્યની કુદરતી લાગણીઓનો જ એક ભાગ છે. સામાજિક પૂર્વગ્રહો અને પૂરતી માહિતીના અભાવે મનમાં ડર, મૂંઝવણ કે અપરાધભાવ પેદા થવો સ્વાભાવિક છે, પરંતુ આ આકર્ષણ સ્વીકાર્ય છે. રહી વાત તમારા ડરની તો મનમાંથી એ ડર કાઢી નાખો કે તમારામાં કોઈ ખામી છે. તમે જેવા છો તેવા સંપૂર્ણ અને સામાન્ય છો. સોશિયલ મીડિયા કે અજ્ઞાની લોકોની વાતોમાં આવીને પોતાના પર શંકા ન કરો. જો મૂંઝવણ વધુ હોય, તો LGBTQ+ ફ્રેન્ડલી કાઉન્સિલર અથવા મનોવૈજ્ઞાનિકની મદદ લો. તેઓ તમને તમારી લાગણીઓને સમજવામાં સચોટ માર્ગદર્શન આપશે. તમારી લાગણીઓનો આદર કરો અને આત્મવિશ્વાસ સાથે જીવન જીવો.