તવરા ગામની સરકારી જમીન મામલે ગ્રામજનોનો વિરોધ:કલેક્ટરને આવેદન આપી જમીન જાહેર હેતુ માટે અનામત રાખવાની માંગ

ભરૂચ તાલુકાના તવરા ગામમાં સરકારી જમીનને લઈને વિવાદ ઊભો થયો છે. રેવન્યુ સર્વે નંબર 118 પૈકીની જમીન અંગે અક્ષર પુરુષોત્તમ સંસ્થા દ્વારા રી-ગ્રાન્ટની કાર્યવાહી કરવાની માંગ સામે ગ્રામજનોએ વિરોધ નોંધાવ્યો છે. ગ્રામજનોએ ભરૂચ જિલ્લા કલેક્ટરને આવેદનપત્ર આપી આ જમીન સરકાર હસ્તક જ રાખી જાહેર ઉપયોગ માટે અનામત રાખવાની માંગ કરી છે. રી-ગ્રાન્ટની કાર્યવાહી સામે ગ્રામજનોમાં અસંતોષ ગ્રામજનોના જણાવ્યા મુજબ, તવરા ગામની રેવન્યુ સર્વે નંબર 118 પૈકીની જમીન અંગે અક્ષર પુરુષોત્તમ સંસ્થા દ્વારા રી-ગ્રાન્ટની કાર્યવાહી કરવાની માંગ કરવામાં આવી છે. આ મામલે ગ્રામજનોમાં અસંતોષ જોવા મળી રહ્યો છે. ગ્રામજનોએ રજૂઆત કરી છે કે જમીનનો ઇતિહાસ તેમજ અગાઉના સરકારી હુકમોને ધ્યાનમાં લઈને જમીન સરકાર હસ્તક જ રાખવી જરૂરી છે. મહેસૂલી રેકોર્ડમાં સુધારા કરવાની પણ માંગ ગ્રામજનોએ કલેક્ટરને કરેલી રજૂઆતમાં જણાવ્યું છે કે સમગ્ર મામલે અગાઉના હુકમો અને જમીનના રેકોર્ડની યોગ્ય તપાસ કરવામાં આવે. સાથે જ મહેસૂલી રેકોર્ડમાં જરૂરી સુધારા કરવામાં આવે તેવી પણ માંગ કરવામાં આવી છે. 10 હજારથી વધુ વસ્તી માટે જાહેર સુવિધાઓની જરૂરિયાત ગ્રામજનોના જણાવ્યા પ્રમાણે તવરા અને નવા તવરા ગામની સંયુક્ત વસ્તી અંદાજે 10 હજારથી વધુ છે. વસ્તીમાં સતત વધારો થઈ રહ્યો હોવાથી આગામી સમયમાં વિવિધ જાહેર સુવિધાઓ માટે જમીનની જરૂરિયાત ઊભી થવાની શક્યતા છે. ખાસ કરીને રમતગમતનું મેદાન, પ્રાથમિક શાળા, લાઇબ્રેરી, આંગણવાડી, કોમ્યુનિટી હોલ, પીવાના પાણીની સુવિધા તેમજ પશુઓ માટેની જગ્યાની જરૂરિયાત હોવાનું ગ્રામજનોએ જણાવ્યું છે. જાહેર હિતમાં જમીન સરકાર હસ્તક રાખવાની માંગ ગ્રામજનોએ માંગ કરી છે કે આ જમીન કોઈ સંસ્થાને આપવાને બદલે સરકાર હસ્તક જ રાખવામાં આવે અને તેનો ઉપયોગ ગામના જાહેર હિત માટે કરવામાં આવે. ભવિષ્યમાં ગ્રામજનોને જરૂરી સુવિધાઓ ઉપલબ્ધ કરાવવા માટે જમીન અનામત રાખવી જરૂરી હોવાનું પણ રજૂઆતમાં જણાવાયું છે. કલેક્ટર સમક્ષ તાત્કાલિક કાર્યવાહી માટે રજૂઆત સમગ્ર મામલે જમીનના દસ્તાવેજો અને મહેસૂલી રેકોર્ડની યોગ્ય તપાસ કરી હકીકત બહાર લાવવામાં આવે અને ગ્રામજનોના હિતને ધ્યાનમાં રાખીને તાત્કાલિક યોગ્ય કાર્યવાહી કરવામાં આવે તેવી માંગ સાથે ગ્રામજનોએ જિલ્લા કલેક્ટરને આવેદનપત્ર આપ્યું છે.